ASTANA. 11 qańtar. Bas prokýratýranyń Quqyqtyq statıstıka jáne arnaıy esepke alý jónindegi komıtetine (QSjAEK) baqylaý jáne qadaǵalaý organdarynyń tekserýler kestesin ornalastyrý júktelgen. Bul týraly Bas prokýratýranyń baspasóz qyzmeti habarlady.
QSjAEK-ke 2016 jyldyń I jarty jyldyǵyna arnalǵan erekshe tártip boıynsha tekserýler kestesine ornalastyrý úshin tórt memlekettik organnyń – Ishki ister mınıstrligi Tótenshe jaǵdaılar komıtetiniń, Ulttyq ekonomıka mınıstrligi Tutynýshylardyń quqyqtaryn qorǵaý komıtetiniń, Investısııalar jáne damý mınıstrligi Indýstrııalyq damý jáne ónerkásiptik qaýipsizdik komıtetiniń, Qarýly Kúshterdiń Bas áskerı-medısınalyq basqarmasynyń tekserýler kesteleri kelip tústi.
Komıtet zań buzýshylyq bolyp tabylatyn memlekettik tirkelgen sátinen 3 jyl merzimi ótpegen shaǵyn kásipkerlik sýbektilerin tekserý kestelerine qosý faktilerin anyqtaý úshin kelip túsken kestelerge taldaý júrgizdi. Monıtorıng barysynda tutynýshylardyń quqyqtaryn qorǵaý organdarynda osyndaı 77 fakt, tótenshe jaǵdaılar jónindegi organdarda 20 fakt, sonymen qatar, kestelerge durys emes derekterdi engizýge baılanysty 200-den astam buzýshylyq anyqtaldy.
Osyǵan baılanysty, ýákiletti organdardyń mekenjaıyna zańdylyqtyń buzylýyn joıý týraly usynystar engizildi, zańsyz tekserýler kestelerden alynyp tastaldy.
Júrgizilgen jumystyń nátıjeleri boıynsha kelip túsken barlyq kesteler Bas prokýratýranyń saıtynda ornalastyryldy. QSjAEK zańsyz tekserýlerdiń aldyn alý, memlekettik organdardyń kásipkerlik qyzmetke zańsyz aralasýyn boldyrmaý boıynsha jumysty jalǵastyrýda.
Elaman Qońyr.
Derek: Bas prokýratýranyń baspasóz qyzmeti.
Sýret: egov.kz.