Keshe Astanada «Aýyl» halyqtyq-demokratııalyq patrıottyq partııasynyń tóraǵasy Álı Bektaevtyń qatysýymen brıfıng ótti. Onda Elbasynyń besinshi shaqyrylǵan Parlament Májilisin taratý jáne Parlament Májilisi depýtattarynyń saılaýyn kezekten tys ótkizý týraly Jarlyǵyna baılanysty «Aýyl» partııasynyń málimdemesi jarııa etildi.
Jıynda Álı Bektaev «Aýyl» partııasynyń basshylary men músheleri depýtattardyń besinshi shaqyrylǵan Parlament Májilisin taratyp, Májilis pen barlyq deńgeıdegi máslıhattar depýtattarynyń saılaýlaryn ótkizý týraly bastamasyna qatysty Memleket basshysynyń oń sheshim qabyldap, tıisti Jarlyqqa qol qoıǵanyn qýanyshpen qabyl alǵandaryn jetkizdi. Sondaı-aq, ol elimizdiń ekonomıkalyq áleýetin sóz ete kelip: «Búginde Qazaqstan astyq, dándi-daqyldar, sút-et ónimderiniń, balyq jáne basqa da azyq-túlik túrleriniń iri eksporttaýshysyna aınaldy. Dese de, jahandyq ekonomıkalyq daǵdarystyń jańa tolqyny qarsańynda biz óz bolashaǵymyzǵa, kúshimizge senimdi bolýymyz kerek», – dedi.
Sonymen qatar, spıker elimizdiń aldynda Prezıdent usynǵan 5 ınstıtýttyq reformany sátti júzege asyrý arqyly álemdik daǵdarystyń saldaryn jeńildetý mindeti turǵanyna nazar aýdara kelip: «Májilis depýtattarynyń saılaýyn kezekten tys ótkizý jáne barlyq deńgeıdegi máslıhattar depýtattarynyń kezekti saılaýyn ótkizý arqyly biz halyq qalaýlysy bolýǵa eń laıyqty, bilikti, Qazaqstannyń naǵyz janashyr patrıottaryn irikteı alamyz. Sonymen qatar, bul – memleket qurylysynyń jańa kezeńindegi jańadan jasaqtalǵan Parlamentte óz qarym-qabiletin kórsetý úshin ózge de partııalarǵa berilip otyrǵan zor múmkindik», – dedi.
Á.Bektaev sóziniń sońyn: «Osy oraıda, aýyl jurtynyń, qarapaıym sharýalar men aýylsharýashylyq taýar óndirýshi kásipkerlerdiń partııasy retinde Parlament depýtattarynyń der kezinde kótergen bastamasyn qoldaımyz jáne oǵan qatysty oń sheshim qabyldaǵan Elbasyna zor alǵys aıtqymyz keledi», – dep túıindedi.
Eske sala keteıik, «Aýyl» halyqtyq-demokratııalyq patrıottyq partııasy 2015 jyldyń 5 qyrkúıeginde burynǵy Qazaqstan sosıal-demokratııalyq «Aýyl» partııasy men «Qazaqstan Patrıottary» partııasynyń elimizdiń jáne azamattardyń múddelerin eskere otyryp, birtutas uıymǵa birigý týraly sheshimine sáıkes qurylǵan bolatyn.
Joldybaı BAZAR,
«Egemen Qazaqstan».