Qasym-Jomart Toqaev elimizge memlekettik saparmen kelgen Mońǵolııa Prezıdenti Ýhnaagıın Hýrelsýhty «Altyn Qyran» ordenimen marapattady, dep habarlaıdy Egemen.kz
Memleket basshysy tarıhı sapar aıasynda marapattaý rásimin ótkizý qazaq tarapy úshin zor mártebe ekenin atap ótti.
«Biz Sizdi óz halqyn alǵa bastap kele jatqan parasatty, bilikti, iri saıasatker dep bilemiz, syılaımyz. Mońǵolııany kórkeıtý jolyndaǵy qajyrly eńbegińizdi joǵary baǵalaımyz. Salıqaly saıasatyńyzdyń arqasynda elińiz ósip-órkendep keledi. О́zińizdiń bastamańyzben túrli salada tyń jobalar júzege asyrylyp jatyr. Mońǵolııanyń ekonomıkasy damyp, halqyńyzdyń ál-aýqaty jaqsardy. Sonymen qatar elińizdiń aımaqtaǵy jáne álemdegi bedeli arta tústi. Sizdiń basshylyǵyńyzben mońǵol jurty aldaǵy ýaqytta da bıik belesterdi baǵyndyra beretinine kámil senemiz», dedi Qasym-Jomart Toqaev.
Qazaqstan Mońǵolııaǵa ǵaryshtan baqylaý júıesin qurýǵa kómektesedi
Prezıdent eki el arasynda shynaıy dostyq pen ózara qurmetke negizdelgen qarym-qatynas ornaǵanyna toqtaldy.
«Siz Mońǵolııa Úkimetin basqarǵan kezde eki eldiń ekonomıkalyq yntymaqtastyǵyn damytýǵa tikeleı atsalysqan edińiz. Endi, mine, Memleket basshysy retinde bul baǵyttaǵy jumysty jańa qarqynmen jalǵastyryp kelesiz. Birlesken kúsh-jigerimizdiń arqasynda qazaq-mońǵol baılanysy strategııalyq seriktestik deńgeıine kóterildi. Búgin qol jetkizilgen mańyzdy kelisimder dostyǵymyzdy odan ári bekemdeı túsetini sózsiz. Qazirgi almaǵaıyp, dúbirli kezeńde osy yqpaldastyǵymyzdy kúsheıtýdiń máni aıryqsha. Buǵan barlyǵymyz da múddelimiz. Siz qazaq-mońǵol qarym-qatynasyn nyǵaıtýǵa zor eńbek sińirdińiz. Osyǵan oraı, men О́zińizdi Qazaqstan Respýblıkasynyń eń joǵary memlekettik nagradasy – «Altyn Qyran» ordenimen marapattaý týraly sheshim qabyldadym. Bul nagrada – barsha qazaq halqynyń Sizge jáne baýyrlas mońǵol jurtyna degen erekshe qurmetiniń belgisi. Qazaqstan men Mońǵolııanyń dostyǵy máńgi bolsyn», dedi Memleket basshysy.
Qazaqstan men Mońǵolııa arasyndaǵy saýda kólemi 7,7 paıyzǵa ósti
Ýhnaagıın Hýrelsýh Qasym-Jomart Toqaevqa joǵary marapat tapsyrǵany úshin alǵys aıtyp, Qazaqstanmen dostyq qarym-qatynasty odan ári damytý jolynda barynsha kúsh-jiger jumsaýǵa daıyn ekenin jetkizdi.