ASTANA. 27 qańtar. Búgin Qurlyqtyq hokkeı lıgasy sheńberinde Astananyń «Barysy» Chelıabiniń «Traktoryn» qabyldady. Saıystyń pleı-off satysyna joldama alý úshin baryn salǵan astanalyqtar oıyn sońyndaǵy býllıtten 5:4 esebimen jeńiske jetti. Bul týraly egemen.kz tilshisi habarlady.
Atalǵan match lıganyń turaqty chempıonaty aıasynda «Barystyń» bıylǵy maýsym barysynda óz aıdynyndaǵy sońǵy oıyny ekenin atap ótken jón. Kezdesý aıdyn ıeleriniń shabýylymen bastaldy. Nátıjesinde 4-mınýtta oıynshy basymdyǵyn júzege asyrǵan astanalyqtar Naıdjel Doýstyń kómegimen esep ashty. Al 13-mınýtta bizdiń komanda sapynan Roman Starchenko tóreshi belgilegen býllıtti sátti oryndap, esepti eseledi. Arada tórt mınýt ótkende, «Traktor» oıynshy basymdyǵyn paıdalanyp, Andreı Popov mergendigimen kózge tústi. Alaıda, 19-mınýtta Roman Savchenko taǵy da «Barysty» eki shaıba aıyrmasymen alǵa shyǵardy.
Ekinshi kezeńniń alǵashqy úsh mınýty elordalyqtar úshin naǵyz syn saǵaty boldy. Kezeń bastala salysymen alǵa umtylǵan reseılikter aınaldyrǵan 52 sekýndtyń ishinde bizdiń qaqpaǵa úsh shaıba engizdi. Aldymen, 23-mınýt bastalǵan tusta taǵy da bir oıynshysy artyq bolǵan «Traktor» hokkeıshileri Anton Glınkınniń nátıjeli soqqysymen ekinshi shaıbalaryn soqty. Arada bar bolǵany 20 sekýnd ótkende, Martın Rýjıchka tarazy basyn teńestirdi. Osy goldan keıin «Barystyń» bas jattyqtyrýshysy Andreı Nazarov qaqpashy Iаn Lasonyń ornyna Pavel Polýektovti shyǵardy. Degenmen, Pasha da aıdynǵa aıaǵy tıgen boıda qaqpadan shaıba alyp shyǵýǵa májbúr boldy. Iаǵnı, Rýjıchkanyń golynan keıin 32 sekýnd ýaqyt ótkende, Maksım Iаkýsenıa esepti «Traktordyń» paıdasyna 4:3-ke jetkizip, komandasyn alǵa shyǵardy. Úziliske deıin osy esep saqtaldy.
Sońǵy bólikte «Barys» oıynshylary saýatty qımyldady. Nátıjesinde 51-mınýtta Dastın Boıd qarsylastar qaqpasyn dál kózdep, esepti teńestirdi. Kezdesýdiń negizgi ýaqytynda esep ózgermeı, komandalar overtaımda synǵa tústi. Bul ýaqytta da birin biri ala almaǵan «Barys» pen «Traktor» jeńimpazdy anyqtaý úshin oıyn sońyndaǵy býllıtke júgindi. Al atalǵan synda astanalyqtardyń joly bolyp, «Barys» mańyzdy jeńiske qol jetkizdi.
Búginde «Barys» 80 upaımen Shyǵys konferensııasynda 7-orynda keledi. Al 8-orynda turǵan «Avtomobılıste» 79 upaı bolsa, 9-satydaǵy «Neftehımıktiń» qorjynynda 78 upaı bar. Odan bólek, bul eki komandanyń bizden bir oıyny kem ekenin de eskergenimiz jón.
Endi elordalyqtar lıganyń turaqty chempıonaty sheńberinde 5 kezdesý ótkizedi. Nazar aýdararlyǵy, bes oıyn da qonaqta oınalady. Sondyqtan saıystyń pleı-off satysyna ótý úshin bizdiń jigitterge qalǵan ár matchtan upaı alý kerek.
«Barys» kelesi kezdesýin 1 aqpanda Ýfada jergilikti «Salavat Iýlaevpen» ótkizedi. Al turaqty chempıonat 18 aqpanda aıaqtalady.
Elaman Qońyr.
Derek: egemen.kz.
Sýret: hcbarys.kz.