ASTANA. 28 qańtar. Perý prezıdenttigine úmitker ǵylymı zertteý jumysyn bireýdiń shyǵarmasynan urlap jazǵany úshin saılaýǵa qatystyrylmaýy múmkin. Bul týraly TASS aqparat agenttigine silteme jasaǵan egemen.kz tilshisi habarlady.
Prezıdenttikke úmitker Sesar Akýnıa doktorlyq dıssertasııasyn ózgeden kóshirip alǵany úshin saılaýaldy jarysqa qatyspaı qalýy ábden múmkin. Ulttyq saılaý sotynyń tóraǵasy Fransısko Tavaranyń habarlaýynsha, qazirgi tańda saıasatkerdiń ǵylymı jumysyn Komplýtense Madrıd ýnıversıtetiniń oqytýshylary zertteýde. Sesar Akýnıa ǵylymı dárejesin dál osy oqý ordasynda 2009 jyly alǵan bolatyn.
«Arnaıy saılaý, Ulttyq saılaý soty da etıkalyq máselelerdi qarastyryp otyrǵan joq. Biz tek osy ne basqa da is-áreketterdiń zań talaptaryna sáıkestigin tekserip jatyrmyz. Ǵylymı jumystyń túpnusqalyǵy týraly sheshimdi ýnıversıtet shyǵarýy kerek», – dep atap ótti Fransısko Tavara. Sot tóraǵasy sondaı-aq, zań boıynsha úmitkerdiń ózi týraly kórineý teris málimet berýi ony saılaýǵa qatystyrmaýǵa ákep soǵatynyn da aıtyp ótti.
Al, Sesar Akýnıa bul daý-damaıdyń artynda saıası sebep turǵanyna sendirip otyr. «Ǵylymı jumysyma qatysty aıyptan úzildi-kesildi bas tartamyn. Bul jaǵdaıdy meniń prezıdenttikke úmitkerligimnen qutylý úshin paıdalanǵylary keledi. Maǵan qatysty qaıtalanyp jatqan qarsylyqtar saıası qarsylastarymnyń meni jaqtaǵan halyq qoldaýynyń qarqyn alýynan qorqa bastaǵanyn kórsetedi», – dep málimdedi ol.
Esterińizge sala keteıik, Perýde prezıdenttik saılaý 2016 jyldyń 10 sáýirinde ótedi. Qoǵamdyq pikirge júrgizilgen saýalnama memleket basshylyǵy laýazymyna úmitkerler arasynda «Halyq kúshi» partııasynyń basshysy Keıko Fýhımorı kósh bastap turǵanyn kórsetip otyr. Keıko – osy eldiń burynǵy prezıdenti Alberto Fýhımorıdiń qyzy. Eks-prezıdenttiń ózi qazirgi tańda birneshe aıyby boıynsha túrmede jazasyn ótip jatyr. Keıko Fýhımorıge saýalnamaǵa jaýap bergenderdiń úshten biri daýys berýge daıyn. Al Sesar Akýnıa bul reıtıngtegi ekinshi oryndy ekonomıst Pedro Kýchınskımen bólisken. Eki úmitkerdi de perýlikterdiń 13 paıyzy qoldaýǵa daıyn. Eger birinshi aınalymda úmitkerlerdiń birde-biri 50 paıyz daýys jınaı almasa, Perýde daýys berýdiń ekinshi kezeńi ótedi.
Elaman Qońyr.
Derek: TASS.
Sýret: ukrinform.ru.