Álem-jálem álem
Amerıkanyń Internationalliving.com basylymy álemdegi zeınetke shyqqannan keıin baryp turýǵa bolatyn eń qolaıly elder reıtıngisin jasady. Onda birinshi oryn Kambodjaǵa telindi.
Qolaıly elder tizimine jalpy 23 el enipti. Ol boıynsha ekinshi orynǵa Nıkaragýa shyqsa, úshinshi orynǵa Kolýmbııa jaıǵasqan. Mundaǵy basty mezet ómir súrýdiń jeńildigi, turmys tynyshtyǵy, azyq-túlik baǵalary men qyzmet túrleriniń arzanshylyǵy bolǵan.
Rıo Olımpıadasyna bosqyndar quramasy qatysady
Bıylǵy jazda Rıo-de-Janeıro qalasynda ótkeli turǵan Olımpııalyq oıyndarǵa bosqyndar da jeke qurama retinde qatysatyn boldy.
Qazirgi tańda Eýropa elderinde bir mıllıonnan astam mıgranttar turyp jatyr. Halyqaralyq olımpııalyq komıtettiń prezıdenti Tomas Bah bul jónindegi qarardy 193 eldiń 180-i qoldaǵanyn aıtty. «Osy arqyly biz álemdegi jalpy sany 60 mıllıon adam bolatyn bosqyndar problemasyna jurt nazaryn aýdarǵymyz keledi», – dedi HOK basshysy.
Úndi bıznesmeni toıǵa 18 myń jesirdi shaqyrdy
Úndistannyń Mehsana qalasynda turatyn bıznesmen Djıtendra Pateldiń kenje uly Ravıdiń úılený toıyna 18 myń jesir qatysty.
Toı saltanaty Gýdjarat shtatynyń Hımmatnagar qalasyna jaqyn mańdaǵy Derol derevnıasynda ótti. Bul – ejelgi hramdarynyń kóptigimen tanymal bolǵan eldi meken. Al toı ıesi dastarqandy ashý rásiminde jańa paıda bolyp jatqan jas otaý ıelerine qoǵamnan teperish kórgen miskin jandardyń bata bergenin qalaǵanyn, munyń uly men kelini úshin úlken sabaq bolatynyn aıtty.
Ostanada 28 jyldan beri birinshi ret náreste ómirge keldi
Italııanyń alys túkpirdegi Ostana degen shaǵyn qalashyǵynda sońǵy 28 jyldan beri birinshi ret jańa týǵan shaqalaqtyń daýsy estildi.
Kishkentaı Pablıta eldi mekenniń 85-shi turǵyny bolyp tirkeldi. Mundaǵy jurttyń jartysyna jýyǵy ǵana jyl on eki aı boıy bul jerdi meken etedi eken. Taýly aýmaqtaǵy qonys turǵyndary 31 qańtarda bári bolyp, ómirge jańa sábı kelýin atap ótkeli otyr.
Qyrǵyz aýla sypyrýshylary depýtattardan kóp tabys tabady
Qyrǵyzstan astanasy – Bishkek qalasyndaǵy «Tazalyq» mýnısıpaldy kásipornynyń qyzmetkerleri taıaý aralyqtan beri 50 myń som (605 eýro) kóleminde aılyq jalaqy ala bastady.
Buǵan arnaıy tehnıkany jalǵa alýshylyqtyń da áseri bolǵan sııaqty. Osyǵan oraı Sputnik jańalyqtar agenttigi endi aýla sypyrýshylardyń jalaqyny Jogorký Kenesh depýtattarynan da kóp alyp otyrǵan málimdedi. Shyn máninde halyq qalaýlylary aılyqtarynyń tómengi mólsheri 30 myń somdy (360 eýro) quraıtyn kórinedi.
Norveg qyzy óziniń mysyq ekenine kúmán keltirmeıdi
Norvegııada jasaıtyn Nano esimdi 16 jasar qyz ózin mysyqpyn dep sanaıdy. Aıtýynsha, ol óziniń adam emes ekenin jaqynda ǵana bilgen.
Nano adam qalpynda ómirge kelgenin tabıǵattyń qateligi dep eseptep otyr. Al kez kelgen dybysty keremet estıtin, qarańǵyda óte jaqsy kóretin qasıetterin mysyq ekenine aıǵaq dep qaraıdy. Qazir ol dosy Sven ekeýi bir-birlerimen mııaýlasyp, «mysyqsha» sóılesedi eken. Sózderine qaraǵanda, olar sonda bir-birlerin keremet túsinetin bolǵan.
Aqparat agenttikteriniń materıaldary negizinde daıyndaldy.