Elbasymyzdyń ótken jyldyń aıaǵyndaǵy Qazaqstan halqyna Joldaýy ultymyzdyń rýhyn kóterdi. Armanymyzdy oıatty. Al jyldyń basynda jarııalanǵan Elbasynyń maqalasy «100 naqty qadam» Ult Jospary sheńberinde Qazaqstannyń bolashaǵy qandaı bolmaq, álemdegi aldyńǵy qatarly 30 eldiń qataryna ený úshin ne istelýi kerek degen sııaqty kúrdeli mindetterdi sheshýge baǵyttalǵan. Sondaı-aq, partııanyń árbir sezinde bolashaqqa arnalǵan baǵdarlamalar qabyldanady. Bul baǵdarlamalar ulttyń damýymen, elimizdiń órkendeýimen tyǵyz baılanysty. Sondyqtan da Elbasy, «Nur Otan» partııasynyń Tóraǵasy sezde sóılegen sózinde eldiń aldynda, partııanyń aldynda turǵan keleli mindetterdi jan-jaqty saraptap berdi.
Prezıdentimiz áýeli ekonomıka, sosyn baryp saıasat degen bolatyn. Osy tujyrymnyń ómirsheńdigine búginde naqty kóz jetkizdik. 1995 jyly Joǵarǵy Keńestiń XIII shaqyrylymy taratylǵan sátte túsinińkiremegen bolatynbyz. Kúnder ótkennen keıin, araǵa jyldar salǵannan keıin saraptasam, sol shaqyrylymda bir jylda bir ǵana zań qabyldaǵan ekenbiz. Kúni boıy jumysymyzdyń bári bir-birimizben aıqaılasý, talas-tartyspen ótipti. Ekonomıka, Úkimettiń aldyndaǵy mindetter qaıda – bul máseleler talqylanǵan joq. Mine, osydan keıin Elbasynyń «áýeli – ekonomıka, sosyn saıasat» degen sóziniń mánin jaqsy túsinýge bolady.
Jańa saılaý qoǵam ómirine, eldiń órkendeýine jańa lep ákeledi dep oılaımyn. «Nur Otan» partııasy búgin ekonomıkany, qarjylyq qatynasty, bank júıesin, jalpy, aýyl problemalaryn tereń biletin bilikti úmitkerlerin dodaǵa qosty dep bilemin. Qazirgi jaǵdaı kúrdeli. Degenmen, halyq prezıdenttik partııaǵa úlken senim artyp otyr. О́ıtkeni, halyq byltyr ótken prezıdenttik saılaýda Elbasyn aıqyn qoldaıtyndyqtaryn bildirdi. Sondyqtan «Nur Otan» partııasy saılaýda eń kóp daýys alatynyna senimdimin. Sondaı-aq, saılaý uıymdasqan túrde ádil, saıası naýqan jaǵdaıynda ótedi dep oılaımyn.
Ýálıhan QALIJANULY,
M.Áýezov atyndaǵy Ádebıet jáne óner ınstıtýtynyń dırektory.