Qarshadaı balanyń erligi

О́rtten baýyrlaryn aman alyp qalǵan 11 jasar Danııar «Erligi úshin» tósbelgisimen marapattaldy Kózsiz erlikke barý, batyl qımyldap, batyrlyq tanytý – qazaqtyń qanynda bar qasıet. Taıaýda ultymyzdyń osy bir ereksheligin 11 jasar qarshadaı bala taǵy bir dáleldep berdi. Atap aıtqanda, Almaty qalasyndaǵy shaǵyn aýdandardyń birinde turatyn Danııar Satybaldy esimdi erjúrek bala otqa oranǵan úıinen úsh birdeı baýyryn aman alyp shyǵyp, batyrlyqta shek bolmaıtynyn pash etti. Onyń bul áreketi laıyqty baǵasyn alyp, Danııar «Tótenshe jaǵdaıdaǵy erligi úshin» tósbelgisimen marapattaldy. Aldymen atalǵan oqıǵaǵa toqtalyp óteıik. О́tken jyldyń 29 qarashasynda Almaty qalasy «Uljan-1» shaǵyn aýdany Tákejanov kóshesindegi jer úılerdiń birinde órt shyqqan. Tótenshe jaǵdaı kezinde úıde Danııar men onyń qaryndastary – 8 jasar Gúlmıra, 7 jasar Dınara jáne úsh jasar Damır esimdi inisi bolǵan. Osy kezde shuǵyl sheshim qabyldaǵan Danııar qolymen tereze áınegin syndyryp, baýyrlaryn dalaǵa alyp shyqqan. Osy erligi úshin Almaty qalalyq tótenshe jaǵdaılar departamentiniń ókili batyr bala oqıtyn №152 mektep-gımnazııaǵa arnaıy kelip, Danııardy kóp­shiliktiń kózinshe marapattady. Saltanatty shara kezinde eldiń qoshemetinen qysylyp, uıańdyq tanytqan jas batyr sol kúngi jaǵdaıdy qaz qalpynda baıandap berdi. Marapattaýǵa kelgen qalalyq tótenshe jaǵdaılar departamentiniń ókili Baǵdat Shaızada 11 jasar balanyń bul erligin kez kelgen eresek adamnyń jasaı almaıty­nyna nazar aýdardy. Onyń aıtýynsha, Danııar qala boıynsha eń jas qutqarýshy eken. – Mundaı jastaǵy balanyń osyndaı erlik jasaýy bizdiń tájirıbemizde birinshi ret kezdesip otyr. Baýyrlaryn aıt­paǵanda, Danııardyń ózi de áli oıyn bala­sy ekenin eskersek, rasymen eriksiz basy­myzdy shaıqaýǵa májbúrmiz. Sebebi, mundaı jaǵdaıda eresek jan­dardyń ózi sheshim qabyldaýǵa qınalyp jatady. Al Danııar baýyrlary úshin kóz­siz erlikke baryp otyr, – dedi depar­ta­ment ókili. Iá, búginde baýyrlarynyń, ata-ana­synyń jáne mektebiniń maqtanyshyna aınalǵan Danııardyń bul áreketi kózsiz erlik ekeni sózsiz. Qazaqtyń «júreginiń túgi bar» degen qanatty sózi de osyndaı kezde aıtylsa kerek-ti. Elaman QOŃYR, «Egemen Qazaqstan».