Tárbıe taǵylymy

Elimizde «О́zin-ózi taný: Súıispenshilik pen Shyǵarmashylyq pedagogıkasy» atty onkúndik bastaldy Bilim jáne ǵylym mınıstrliginiń Balalardyń quqyqtaryn qorǵaý komıteti respýblıkanyń barlyq uıymdarynda 2016 jylǵy aqpan aıynyń 2-si men 12-si ara­lyǵynda «О́zin-ózi taný: Súıispenshilik pen Shyǵarmashylyq pedagogıkasy» atty dástúrli onkúndigin jarııalady. Onkúndiktiń maqsaty balalar men jastardy adamgershilik-rýhanı tárbıeleý júıesin damytý, olardyń azamattyq mádenıet daǵdylaryn jetildirý bolyp tabylady. Keshe respýblıkanyń barlyq bilim berý uıymdarynda onkúndiktiń merekelik ashylý rásimi bolyp ót­ti. Onkúndik aıasynda semınarlar, kitaptar kórmesi, dóńgelek ús­tel­der, ashyq sabaqtar, balalardyń shyǵarmashylyq baıqaýlary, qaıy­­rymdylyq aksııalary, kı­no­teatr­larǵa, oıyn-saýyq ortalyq­ta­ryna, sporttyq keshenderge barý, ata-analardyń qatysýymen aýqymdy is-sharalar uıymdastyrý josparlanýda. 2010-2011 oqý jylynda «О́zin-ózi taný» adamgershilik-rýhanı bilim berý baǵdarlamasy barlyq bilim berý deńgeılerinde, mektepke deıingi mekemelerden bas­tap joǵary bilim berý salalaryna da engizilgen bolatyn. Alǵash ret memlekettik deńgeıde ós­keleń urpaqty ámbe­bap jáne jal­pyadamzattyq qundylyqtarǵa oqytý mindetin «О́zin-ózi taný» jo­basynyń avtory Sara Alpysqyzy Nazarbaeva usyndy. Atalǵan baǵ­darlama oqýshylardyń boıyndaǵy shyǵarmashylyq áleýetin tolyq ári jan-jaqty iske asyrýǵa, jahandaný jaǵdaıynda zamanaýı jetistikterge jetýge múmkindik beredi. Sonymen qatar, ómirlik jáne bilim berý stra­­tegııasyn, qoǵamdaǵy aýqymdy áleýmettik taǵylymdardy meńgerýge yqpal etedi. Adamgershilik-rýhanı tárbıe negizindegi osynaý bilim ba­lalardyń dúnıege senimmen shattana qaraýyna jáne tabysqa jetý jolynda senimdi bolýǵa, tárbıe jáne bilim alý úderisinde tıimdi áleýmettenýge kómektesedi.