Jambyl oblystyq óńirlik telekommýnıkasııa qyzmetinde Qazaqstan Respýblıkasy Parlamenti Májilisi men jergilikti máslıhattar saılaýlaryna arnalǵan brıfıng ótti. Oǵan Saılaýdy baıqaý jónindegi respýblıkalyq qoǵamdyq komıssııanyń aımaqtyq fılıalynyń basshysy Parıda Mamedova qatysyp, saıası naýqan – saılaýdyń zań aıasynda ótýi demokratııalyq úderisterdiń ashyqtyǵyn kórsetetinin atap ótti.
– Bıyl Parlament Májilisi men jergilikti máslıhattar saılaýlary ótkeli otyrǵandyqtan, daıyndyq sharalary da qyzý qolǵa alyndy. Komıssııa barlyq kandıdattarǵa teńdeı jaǵdaı jasalýyn qamtamasyz etý úshin jumys isteıtin bolady. Komıssııanyń mindeti – saılaýda kezdesetin quqyq buzýshylyqtardyń aldyn alý. Komıssııa músheleri baıqaýshylardy arnaıy oqytý semınarlary men trenıngter ótkizedi. Oblystyń barlyq saılaý ýchaskelerinde 400-den astam baıqaýshy jumys isteıtin bolady. Basty qoıylatyn talap – «Caılaý týraly» Zańdy bilý. Sonymen qatar, arnaıy ádistemelik quraldar, jadnama jáne hattama úlgisi keltirilgen baıqaýshy kúndeligi daıyndaldy. Baıqaýshy qoıyn kitapshasy daýys berý bastalysymen jáne aıaqtalǵanda toltyrylatyn hattamadan turady. Fılıal keńsesi jumysty úzdiksiz júrgizedi. Demalys kúnderi arnaıy kezekshilik uıymdastyrylady, – dedi P.Mamedova.
Odan ári ol qoǵamdyq komıssııanyń aımaqtyq fılıaly jumysynyń úsh kezeńnen turatynyn eske salyp, barlyq qoǵamdyq uıymdarmen jáne azamattarmen áriptestik qatynas ornatatyndaryn jetkizdi. Saılaýdyń ádil jáne halyqaralyq talaptarǵa saı ótýin qadaǵalap, aqparattandyratyn kórinedi.
Brıfıng barysynda Saılaýdy baıqaý jónindegi respýblıkalyq qoǵamdyq komıssııanyń oblystyq fılıalynyń múshesi Albına Tapaeva da saıası naýqandy ótkizý týraly óz oıymen bólisti. Komıssııa Taraz qalasy, Súleımenov kóshesi №7 úıdegi Taraz memlekettik ýnıversıteti bas ǵımaratyndaǵy 3-qabattyń 302-bólmesine ornalasqan. 50-17-21 senim telefony jumys isteıdi.
El ómirindegi asa zor saıası naýqanǵa baılanysty jýrnalıster ózderin tolǵandyryp júrgen suraqtaryn qoıyp, jaýaptar aldy.
Oralhan DÁÝIT,
«Egemen Qazaqstan».
Jambyl oblysy.