Bıyl Turǵyn úı qurylys jınaq bankiniń jelisi boıynsha qurylys kólemi aldyńǵy jyldarmen salystyrǵanda, birneshe esege artatyn bolady. Memleket basshysy turǵyn úı qurylys jınaq júıesiniń tıimdiligine oń baǵa berip, kredıttik turǵyn úı qurylysyna 149 mlrd.teńge bólýdi tapsyrdy. Atalǵan qarajat 814 myń sharshy metr turǵyn úı salýǵa múmkindik beredi.
Bul jóninde Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda «Qazaqstannyń Turǵyn úı qurylys jınaq banki» AQ basqarma tóraǵasy Aıbatyr Jumaǵulov málim etti. Onyń sózine qaraǵanda, aıtylǵan turǵyn úıler sany shamamen 14 myń páterdi quraıdy. Aıtar bolsaq, 22 mlrd.teńgesi banktiń salymshylaryna nesıe berýge baǵyttalsa, qalǵan 127 mlrd.teńgesi áleýmettik turǵyn úı salý maqsatynda «Báıterek» ulttyq basqarýshy holdıngine bólinedi. Qarjy eki baǵytqa – jergilikti atqarýshy organdarǵa 67 mlrd.teńge jáne «Báıterek development» AQ-qa 60 mlrd.teńge kóleminde aýdarylatyn bolady.
Sonymen qatar, «Báıterek development» AQ jelisimen satylǵan páterler tolyǵymen Turǵyn úı qurylys jınaq banki salymshylaryna tapsyrylmaq. Al, jergilikti atqarýshy organdar jelisimen qarjylandyrylǵan turǵyn úıdi alýshylardyń kem degende 50 paıyzy ákimdik kezegindegi azamattar bolady.
Budaı bylaı bolashaq baspanany jobalaý kezeńinde bank pen onyń tutynýshylarynyń usynystary eskerilmek. Ár sharshy metrdiń quny memlekettik saraptamadan ótkennen keıin naqtylanady, desek te «Báıterek development» AQ jelisi boıynsha ár sharshy metr úshin óńirlerdegi baǵa 180 myń teńgeden aspaıdy. Bul baǵa Almaty men Astana qalalarynda 200 000 teńge kóleminde bolady. Al, jergilikti atqarýshy organdar jelisimen bekitilgen bir sharshy metrdiń baǵasy – óńirlerde 140 000 teńge bolsa, Astana men Almaty qalalarynda 180 000 teńgeni quramaq. Jáne de bıyl Turǵyn úı qurylys jınaq banki 2020 jylǵa deıingi óńirlerdi damytýdyń memlekettik baǵdarlamasy aıasynda jalpy aýdany 459 000 sharshy metr baspanany salymshylaryna tapsyrady. Tutastaı alǵanda, Turǵyn úı qurylys jınaq banki jelisimen shamamen 21 000 páter paıdalanýǵa beriletin bolady.
Bul rette ústimizdegi jyldyń josparlaryn birqatar atap ótken bank basshysy ótken jyldyń turǵyn úı máselesinde nátıjeli bolǵandyǵyn alǵa tartty. 2016 jyldyń qańtaryndaǵy esep boıynsha QTQJB 49,7% úlesimen barlyq ekinshi deńgeıli bankter arasyndaǵy teńgemen ashylǵan depozıtter naryǵynda úzdikter qatarynda tur. О́tken jyldyń qorytyndysyna keler bolsaq, banktiń qurylysqa jáne turǵyn úı alýǵa beriletin nesıe naryǵyndaǵy úlesi 75%-ǵa jetti. Sonymen qatar, problemaly nesıeler úlesi 0,36%-dy qurady. Bul basqa EDB-ler arasyndaǵy eń tómen kórsetkish bolyp otyr.
Sondaı-aq, 2015 jyly turǵyn úı qurylys jınaq júıesin tańdap, QTQJB-da depozıt ashqan salymshylardyń sany 224 703-ti quraǵanyn kóldeneń tartqan A.Jumaǵulov qazirgi tańda banktiń 601 423 qoldanystaǵy depozıtteri bar ekendigin jetkizdi.
Elmıra MÁTIBAEVA,
«Egemen Qazaqstan».