ATYRAÝ. 25 aqpan. Atyraý oblysynyń 68 kásipkeri áleýmettik turmysy tómen 198 otbasynyń 1009 múshesin qamqorlyqqa aldy. Bul týraly Atyraý oblysynyń ákimi Baqtyqoja Izmuhambetovtiń málimdemesine silteme jasaǵan egemen.kz tilshisi habarlady.
El ishi jomart jandarǵa kende emes. Sondaı jandardyń kóbi turmysy tómen otbasylarǵa kórsetken qamqorlyǵyn jarııa etkisi kelmeıdi. Degenmen, jergilikti kásipker Murat Sarmanovtyń Atyraý kásipkerleri áleýmettik turmysy tómen otbasylarǵa kómek kórsetý týraly bastamasyn qyzý qoldady. Máselen, Atyraý qalalyq ákimdigine qarasty Damby aýyldyq okrýginde turatyn Bıbigúl Izbasova aýyldastary, jalǵyz basty ana men múgedekti óz qamqorlyǵyna alsa, taǵy bir jeke kásipker Qanapııa Muqasheva da múmkindigi shekteýli jandy azyq-túlikpen qamtýǵa bekinipti. Osy okrýgtegi Erbolat Musaev óz ıeligindegi «Arýjan» sán salonynda áleýmettik turmysy tómen jandarǵa birneshe tegin qyzmet kórsetýdi, al monsha ıesi Gúljan Muqasheva bala kúninen múmkindigi shektelgen jannan bir jyl boıy aqy almaýdy kózdep otyr.
«Dál osyndaı qaıyrymdylyq tanytqan kásipkerler ózge aýdandarda da bar. Sonyń bir dáleli retinde Inder aýdanyndaǵy Ǵalymjan Nuǵymanov, Sáken Qalıev, Kerimbaı Sabyrǵalıev jáne Qalqaman Ahmetov syndy sharýa qojalyǵynyń jetekshileri men kásipkerler 65 múshesi bar 15 otbasyna birinshi kezekte tutynatyn azyq-túlik satyp bergenin aıtýǵa bolady. Mundaı jomart jandar Jylyoı aýdanynan da tabylyp otyr. Osy aýdanda turatyn kásipker Maǵaýııa Merǵalıevtiń jomarttyǵy ózgelerge oı salarlyqtaı. Ol qazir Qulsary qalasynda 160 oryndyq balabaqsha qurylysyn júrgizip jatyr. Kásipker jigit mektepke deıingi birden-bir tárbıe orny – balabaqshany memleketke túbegeıli tartý etýdi oılastyryp otyr. Taǵy bir jylyoılyq isker jigit Baǵytjan Dostanov óziniń týyp-ósken aýyly – Shoqpartoǵaıda sport kesheniniń qurylysyn aıaqtady. Al Qurmanǵazy aýdanynda Nurlan Qusaıynov 99 jastaǵy ájege úı salyp berdi.
«Geolog okrýginde ótken eseptik jıynda jergilikti kásipker Murat Sarmanov degen azamat sóz alyp, áleýmettik áljaýaz eki otbasyn óz qamqorlyǵyna alýǵa daıyn ekenin aıtty. Qoǵam «Ne alamyn emes, ne beremin» deıtin osyndaı adamdarǵa muqtaj. Barlyq aýdan ákimderine aýyl-aýdandarda Sarmanov sııaqty jigitterge oı salýdy tapsyrdym. Qazir Sarmanov bastamasyna oblystyń 68 kásipkeri qosylyp, 1009 múshesi bar áleýmettik áljýaz 198 otbasyn qamqorlyǵyna aldy. Sondaı-aq, oblystaǵy 139 dúkennen áleýmettik saýda núkteleri ashyldy. Muqtaj jandarǵa azyq-túlik 10-50 paıyz aralyǵynda jeńildikpen satylady. Bul áleýmettik saýda núkteleri 3 myńǵa jýyq adamǵa qyzmet etip otyr», – dep málim etti oblys ákimi Baqtyqoja Izmuhambetov.
Joldasbek Shópeǵul.
Derek: egemen.kz.
Sýret: sxodim.kz.