Nurlan Noǵaevtyń esimi batysqazaqstandyqtarǵa sonaý 2007 jyldan beri jaqsy tanys. О́ıtkeni, ol osy jyly oblys ákiminiń orynbasary bolyp bekitildi. 2012 jyldyń 20 qańtarynda Prezıdent Jarlyǵymen Batys Qazaqstan oblysynyń ákimi bolyp taǵaıyndaldy. Bul kúnnen eseptegende ol keshe Oral óńiriniń jurtshylyǵyna óziniń besinshi esebin bergenine kóz jetkizemiz. Talas joq, atalǵan ýaqyt birqatar isterdiń basyn qaıyryp, óńirdi alǵa damytýdyń strategııasyn belgileýge, ózi bastaǵan isterdiń nátıjesin kórýge molynan jetedi.
Osy merzim aralyǵynda oblys basshysy óziniń alǵa qoıǵan maqsattaryn tyndyrymdy oryndaýǵa, el men Elbasy seniminen shyǵýǵa umtylǵany kópshilikke belgili. Osy tujyrymdy onyń sońǵy bir jyl ishinde atqarǵan qyzmetine qatysty da aıta alamyz. Oblys basshysy retinde oǵan tán basty qasıet shuǵyl sheshimin kútip turǵan máselelerdi jolǵa qoıýǵa umtylysy deýge bolady. Eki arada alys bolashaqtaǵy óńirdiń damý perspektıvalary da udaıy nazarynda júretini baıqalady. Biz biletin oblys basshysy Nurlan Noǵaevqa tán taǵy bir jaqsy qasıet jyl saıynǵy dástúrge aınalǵan esepti bir kúndik is dep qaramaıtyny. Mysaly, jyl basynda aýdan ákimderi esep bere bastaǵan kezde ol arnaıy elge shyǵyp, onyń bárine qatysýdy ádetke aınaldyrǵan. Ári el-jurtty tolǵandyryp júrgen máselelerdi jergilikti jerde sheshýge ádettengen. Aýdan ákimderi esebine jalǵyz barmaıdy. Oblystaǵy jetekshi basqarma, departament basshylaryn erte júretini máseleniń sheshimi tez tabylýyna septigin tıgizýde.
Mysaly, biz bıyl oblys ákimi qatysqan Qaratóbe aýdanynyń ákimi Ashat Shaharovtyń turǵyndarǵa bergen esebine qatysqan edik. Sonda bir kýá bolǵanymyz Nurlan Noǵaevtyń atyna birde-bir saýal berilmedi. Bul neni kórsetedi? Buǵan deıin aqıqat túıin retinde aıtylyp júrgendeı suraq eki jaǵdaıda berilmeıdi. Birinshiden, bári de túsinikti bolǵan jaǵdaıda. Ekinshiden, el ishinde halyqtyń kóńilinen shyǵatyn biraz sharalardyń basy qaıyrylyp qalǵan jaǵdaıda. Ásirese, áleýmettik-turmystyq problemalar túbegeıli sheshimin tapqan kezde. Shynynda da respýblıkanyń eń shalǵaı aýdandarynyń biri – Qaratóbede eldi mekenderdiń gaz qubyryna qosylý kórsetkishi júz paıyzdy quraǵany, barlyq joldarǵa kúrdeli jóndeýler júrgizilgeni jáne halyq kúndelikti tutynatyn ónimder jergilikti jerde óndirilip jatqany osy sózimizdiń bir dáleli.
Oblys ákimi Nurlan Noǵaev óz esebinde respýblıkanyń batystaǵy qaqpasy – Aqjaıyqta ótken jyly atqarylǵan san alýan isterge jan-jaqty, ári tereń taldaýlar jasady. Qur derekterdi tizbeleýge emes, sarabdal saraptamalar men salystyrýlarǵa, oryn alǵan olqylyqtar men kemshilikterden sabaq alýǵa jáne óńir ekonomıkasynyń basty sıpatyn aıqyndaýǵa arnalǵan oblys basshysynyń esebi jóninde el ne dedi?
Dáýletkereı Qusaıynov, Batys Qazaqstan oblystyq mádenıet basqarmasynyń basshysy:
– Bıylǵy oblys ákiminiń esep berý jıynyna oblystyń túkpir-túkpirinen jáne Oral qalasynan úsh myńǵa jýyq adam qatysty. Osy kezge deıin respýblıkadaǵy oblys ákimderiniń esebine tizim boıynsha aldyn ala belgilengen memlekettik qyzmetshiler men «shtattaǵy adamdar» ǵana barady degen túsinik qalyptasqany jasyryn emes. Nurlan Asqaruly óziniń halyqtyń qalyń tobymen kezdesýi kezinde osy túsiniktiń tas-talqanyn shyǵardy. Kezdesý ótetin oryn jáne onyń ótetin ýaqyty BAQ arqyly birneshe dúrkin turǵyndarǵa habarlandy. Kim esepke kelemin, qatysamyn dese, onyń jolyn eshkim qaqqan joq. Bul basshynyń oblys halqyna degen úlken senimi dep túsinýimiz kerek. Al senim tek birjaqty bolmaıdy. Halyqtyń basshyǵa senim júkteıtini sekildi basshynyń halyqqa degen de senimi bolady. Aıtaıyn degenimiz, osy joly oblys basshysynyń ózi basqaryp júrgen turǵyndarǵa degen senimi aıqyn kórindi. Senim júgi qaı taraptan alǵanda da salmaqty emes pe?!
Shahıdolla Ábýǵalı, Jańaqala aýdandyq qoǵamdyq keńestiń tóraǵasy:
– Biz shalǵaıdaǵy aýdan turǵyndary oblys ákiminiń esebine qatysty óz oı-pikirlerimiz ben usynystarymyzdy aldyn ala jiberýge nemese elektrondy poshta arqyly joldaýǵa múmkindik aldyq. Buǵan qosa oblys basshysynyń el-jurt aldyndaǵy esepti baıandamasynyń tujyrymdary oblystyq gazetterde jarııalandy. Osy arqyly aıtatyn oıymyz ben beretin suraǵymyzdy aldyn ala qorytyp, jınaqtaýǵa múmkindik aldyq. Buǵan qosa, keshe ózimiz tyńdaǵan eseptiń keń aýqymdylyǵy men syndarly sıpaty, kókeıkesti máselelerdi aınalyp ótpeı, oǵan qatysty oblys ákiminiń naqty da tujyrymdy oı tolǵaǵany bárimizdiń kóńilimizden shyqty.
Vıktor Fomın, Batys Qazaqstan oblystyq balalar men jasóspirimder ortalyǵynyń dırektory:
– Men Nurlan Asqarulyn ıntellektýaldyq deńgeıi joǵary basshy dep esepteımin. О́ńir basshysyna soqpaıtyn, ony aınalyp ótetin máseleler men problemalar bolmaıdy. Nurlan Asqaruly sonyń bárin tereń zerdelep, soǵan sáıkes qaı kezde de tııanaqty sheshim qabyldaıtynyn baıqap júrmiz. Onyń búgingi myńdaǵan oblys jurtshylyǵynyń aldynda bergen esebinde de óńirge jany ashıtyny, onyń basty patrıoty ekendigi, qazirgi kúrdeli kezeńde oblys ekonomıkasyna qan júgirtip daǵdarystan aldyrmaı-juldyrmaı alyp shyǵýǵa degen talpynysy aıqyn kórindi. Talpyndy deý az. О́ıtkeni, búgingi esepten uqqanym – oblysta ónimderdi óńdeý men uqsatý isinde biraz ister tyndyrylypty. Men osyǵan qýandym. Al tikeleı jasóspirimder men balalar týrızmi salasyna kelsek, munda da oblys basshysynyń qoldaýymen kóp is tyndyryldy. Bul jóninde óńir respýblıkadaǵy bazalyq deńgeıge kóterildi.
Temir QUSAIYN,
«Egemen Qazaqstan».
Batys Qazaqstan oblysy.