saılaý úderisine qatysýshylarmen jaqsy iskerlik qatynas ornatady
Keshe Qazaqstan Respýblıkasy Ortalyq saılaý komıssııasynyń tóraǵasy Qýandyq Turǵanqulov Táýelsiz Memleketter Dostastyǵynan baıqaýshylar mıssııasy shtabynyń basshysy Evgenıı Slobodamen kezdesti. Kezdesýge Ortalyq saılaý komıssııasynyń músheleri jáne Táýelsiz Memleketter Dostastyǵynan baıqaýshylar mıssııasy shtabynyń múshesi E.Kozıak qatysty.
Ortsaılaýkom basshysy men músheleri TMD-dan baıqaýshylar mıssııasy shtabynyń basshysyn 2016 jylǵy 20 naýryzǵa taǵaıyndalǵan Qazaqstan Respýblıkasy Parlamenti Májilisiniń jáne máslıhattarynyń depýtattaryn saılaý jónindegi saılaý naýqanynyń barysy týraly, sondaı-aq, saılaý organdarynyń jumysy men mindetteri jóninde aqparattandyrdy.
Al E.Sloboda saılaý naýqanynyń barysynan tolyq habardar etkeni úshin alǵysyn bildirip, óz tarapynan TMD qurylymdarynan qysqa merzimdi, sondaı-aq, uzaq merzimdi baıqaýshylar ádildik jáne aralaspaýshylyq qaǵıdattaryn ustanatynyn atap ótti. «Mıssııa baıqaýmen barlyq óńirlerdi, sonymen qatar, Astana jáne Almaty qalalaryn qamtýdy josparlap otyr. Qazirgi ýaqytta shtabty qalyptastyrý aıaqtalyp keledi. Jalpy alǵanda, mıssııada 300-den astam baıqaýshy bolady», – dedi E.Sloboda.
Kezdesý barysynda mıssııa basshysy saılaý naýqanyna qatysty aqparattar tolyq kólemde usynylatyndyǵyna da toqtaldy. «Biz Qazaqstanda elektorattyq naýqanǵa birinshi ret monıtorıng júrgizip otyrǵan joqpyz, – dedi E.Sloboda osy jóninde. – Ádettegideı, bizde saılaý organdarymen jáne saılaý úderisine barlyq qatysýshylarmen jaqsy iskerlik qarym-qatynas ornaıdy. Shtabtyń jáne jalpy mıssııanyń jumysy úshin barlyq qajetti aqparat tolyq kólemde usynylady, olar OSK-nyń resmı ınternet-resýrsynda ornalastyrylady. Bul – saılaýdy demokratııaly, transparentti jáne ulttyq saılaý zańnamasyna tolyǵymen sáıkes uıymdastyryp, ótkizýge degen umtylysty kórsetedi».
Kezdesý sońynda Q.Turǵanqulov Táýelsiz Memleketter Dostastyǵynan baıqaýshylar mıssııasyna tabysty jumys tiledi.
* * *
Kezdesýden soń Táýelsiz Memleketter Dostastyǵynan baıqaýshylar mıssııasynyń basshysy Evgenıı Sloboda buqaralyq aqparat quraldarynyń ókilderine brıfıng ótkizdi. Brıfıngte mıssııa basshysy TMD-dan baıqaýshylar mıssııasy eldiń ishki isine aralaspaıtynyn atap ótti. «Kez kelgen saılaý ár memlekettiń jeke isi. Sondyqtan da bizdiń mıssııa saılaý úderisi barysynda memlekettiń ishki isine eshqashan aralaspaıdy», – dedi ol osy jóninde.
E.Sloboda, sondaı-aq, saılaý naýqanyna qatysty qazirge qandaı da bir qorytyndy shyǵara almaıtyndaryn, degenmen, kezekten tys Májilis saılaýyn ótkizýge ázirlik jumystary retine qaraı tolyq kólemde júrgizilip jatqanyn Ortalyq saılaý komıssııasynyń saıtyndaǵy materıaldar arqyly kóz jetkizip otyrǵandaryna da toqtaldy. «Biz erejege sáıkes, saılaýdy baıqaý qorytyndysy boıynsha saılaý ótken kúnniń erteńinde baspasóz máslıhatyn ótkizýge tıispiz. Bul kúni, ıaǵnı 21 naýryzda Qazaqstan halqy Assambleıasynan saılanatyn depýtattardyń saılaýy ótedi. Bizdiń oıymyzsha, saılaýdy baıqaý nátıjesin 22 naýryzda jarııa etken jón sııaqty», – dedi E.Sloboda.
Mıssııa jetekshisi brıfıng barysynda Parlament Májilisi depýtattarynyń saılaýyn baıqaýǵa TMD baıqaýshylary mıssııasyna TMD Atqarýshy keńesiniń tóraǵasy Sergeı Lebedev jetekshilik etetinin atady. Budan bólek ol TMD baıqaýshylar mıssııasynyń quramyna Ázerbaıjan, Belarýs, Reseı, Qyrǵyzstan, Tájikstan, Túrikmenstan, О́zbekstan elderiniń jáne TMD Parlamentaralyq Assambleıasynan, UQShU Parlamenttik Assambleıasynan ókilder kirgenin atap ótti.
Álısultan QULANBAI,
«Egemen Qazaqstan».
Sýretti túsirgen
Erlan OMAROV.