Qapshyq

Atyraýda polıpropılen óniminen tigile bastady Atyraýdaǵy «Qazhım» serik­testigin qurǵan ınvestorlar 2011 jyly burynǵy hımııa zaýytynyń polıpropılen jáne shpagat sehyn jańǵyrtý jumystaryn qolǵa aldy. Qazir bul sehty quddy zaýyt deýge bolady. Aldymen 1,3 gektar aýmaǵy bar nysan qalypqa keltirilip, eski qondyrǵylar jınap áketildi. 2012 jyly «Damý» qorynan nesıege alynǵan 400 mıllıon teńgege avstrııalyq jańa tehnologııanyń jelisi alyndy. Jeliniń júregi – ekstrýder. Bul túıirshektelgen polıpropılendi eritip, qondyrǵy jelisinde birneshe metrlik jaımaǵa aınaldyrady. Osydan soń qapshyqqa qajetti mólsherlermen kesilip, janjaǵy tigiledi. Qajettiligine qaraı polıetılennen astar salynady. Daıyn qapshyqtar syrtyna qajetti derekter jazylyp, tapsyrys berýshige jóneltiledi. – Qazir shıkizatty Reseıden satyp alyp otyrmyz. Eýrazııalyq ekonomıkalyq odaqqa múshe elder arasynda shıkizat tasymaldaýdyń esh qıyndyǵy joq. Burynǵydaı kedendik kedergiler men qaǵazbastylyqtan aryldyq, – deı­di óndiris basshysy Etıvar Mame­dov. – Endi Atyraýdaǵy munaı-hımııa kesheniniń iske qosy­lýyn asyǵa tosyp júrmiz. О́ıt­keni, bizdiń óndirisimiz qanat jaıyp keledi. Qazirdiń ózinde aıyna 120 tonna polıpropılen satyp alýǵa daıynbyz. Osynsha kólemdegi shıkizat aıyna 1 mıllıon dana qant, un, tuz jáne basqa ónimderdi qaptaýǵa arnalǵan qapshyq, sonymen birge, taý-ken ónerkásibine de paıdalanylatyn 30 myń konteıner shyǵarýǵa jetedi. Kásiporynda 185 jańa jumys orny ashylyp, oǵan jergilikti turǵyndar tartylǵan. Olardyń bári de ózge elderdegi osy tektes kásiporyndarda daıyndyqtan ótipti. «Biz úshin turaqty jumys ornynyń bolǵany asa mańyzdy, sol sebepten, kúndelikti isimizdi jaýapkershilikpen atqarýǵa tyrysamyz. Osy kásiporynda jumys jasaǵanyma 4 aıdan endi asyp barady. Bir qaraǵanda, kóp ýaqyt óte qoımasa da, jumysym ózime unaıdy. О́ıtkeni, bizdegi qondyrǵylardyń bári de jańardy, demek, óndirisimizdiń keleshegi bar. Bizdiń sapaly ónimimiz ortaq tabysymyzǵa jol ashady. Sol sebepten, sheberligimizdi shyńdap, tapsyrys berýshiniń suranysyn ýaqytynda oryndaýǵa jumylamyz», dep osy zaýytqa eńbekke tartylǵanyna qýanady ekstrýder operatory Murat Arystanǵalıev. Qazaqstanda dál osyndaı óndiris orny sonshalyqty kóp emes. Túrli kólemdegi qapshyqtar men konteıner, shpagat shyǵaratyn elimizdiń Kókshetaýdan ózge óńirlerinde joq ekenin eskersek, atyraýlyqtar ónimine tek Qazaqstanda ǵana emes, jaqyn shetelderden de suranys arta túseri daýsyz. «Qazhım» ónimderin satyp alýshylar qatarynda «Qazhrom», «Qazazot», «Araltuz» sekildi otandyq iri kásiporyndarmen birge, reseılik tutynýshylar da bar. Sonyń biri – «Kýıbyshevazot» kásiporny. – О́nim óndiretin kez kelgen kásiporyn tutyný naryǵyn keńeıtýdi kózdeıdi ǵoı. Bul rette Eýrazııalyq ekonomıkalyq odaqtyń arqasynda bizge taǵy bir naryq keńistigi – Belarýs eliniń esigi ashyldy. Taǵy bir maqsatymyz – Eýropa naryǵy, – deıdi «Qazhım» JShS bas dırektory Aleksandr Perkın. – О́ıtkeni, Belarýs Respýblıkasynan sol eldiń taýarlary bizdiń qapshyqtarymyzǵa qaptalyp, Eýropaǵa jol tartady. Demek, eýropalyq tutynýshylar nazary Qazaqstanda shyǵarylǵan qapshyqtardyń sapasyna da aýady. Biz qazirdiń ózinde Chehııadan sol sekildiń talaptary men normalaryn zertteýge kirisken óz ókildigimizdi ashyp qoıdyq. Bizdiń taýarymyzdyń úlgileri Germanııa sarapshylary men jetekshi mamandarynyń sertıfıkattaýyna usynyldy. Eýropaǵa kirýimizge ruqsat berilse, bul biz úshin tek tabysymyzdy kóbeıtý ǵana emes, sonymen birge, birinshi kezekte óndiris qýatynyń artýyna, sonymen birge, jańa jumys ornynyń ashylýyna yqpal etedi. Árıne, jegilikti bıýdjetke qosymsha túsimder de kóbeıedi. Joldasbek ShО́PEǴUL, «Egemen Qazaqstan». ATYRAÝ.