TARAZ. 24 naýryz. Jambyl oblystyq tilderdi damytý basqarmasynyń uıymdastyrýymen «Oralhan Bókeı atyndaǵy kórkemsóz oqý sheberleri» oblystyq baıqaýy ótkizildi. Bul týraly egemen.kz tilshisi habarlady.
Baıqaýǵa aýdandar men Taraz qalasynda ótken irikteý kezeńderiniń jeńimpazdary atanǵan 16-22 jas aralyǵyndaǵy 11 úmitker qatysyp, baqtaryn synady. Oblystyq baıqaý Qordaı aýdanynda ótti.
Aýdandar men Taraz qalasynan iriktelip kelgen ónerpazdar baıqaýdyń sharty boıynsha aldymen prozalyq, dramalyq janrlar jáne mánerlep oqý kezeńderi boıynsha jarysqa tústi. Barlyq úmitkerlerdiń baıqaýǵa erekshe daıyndyqpen kelgendikterin atap ótken jón.
Oblystyq baıqaýǵa elordamyz Astana qalasynan Oralhan Bókeıdiń qaryndasy, Qazaqstan Respýblıkasy Ulttyq Akademııalyq kitaphanasynyń oqyrmandarǵa qyzmet kórsetý jónindegi orynbasary Ǵalııa Isaqanova arnaıy kelip qatysty.
Oblystyq baıqaý Oralhan Bókeıdiń shyǵarmalarynan alynǵan kompozısııamen ashyldy.
Alǵashqy synda qatysýshylar O.Bókeıdiń «Qaıdasyń qasqa qulynym?», «Apamnyń astaýy», «О́z otyńdy óshirme» t.b. shyǵarmalarynan úzindini jatqa oqydy. Qatysýshylar «Muztaýdyń muzbalaǵy» atanǵan, qazaq ádebıetiniń kórkemsóz ónerinde erekshe oryn alǵan jazýshynyń shyǵarmalaryna degen qyzyǵýshylyqtaryn kórsete bildi.
Poezııa janry boıynsha M.Maqataev, F.Ońǵarsynova, T.Aıbergenov, M.Shahanov óleńderin mánerlep, naqyshyna keltire oryndady. Al dramalyq nomınasııada shyǵarma tańdaýǵa shek qoıylmaǵandyqtan, úmitkerler M.Áýezov, T.Ahtanov, Ǵ.Músirepov týyndylaryn arqaý etip, akterlyq sheberlikterin barynsha kórsetýge tyrysty.
Baıqaý qorytyndysy boıynsha bas júldeni Taraz qalasy, Abaı atyndaǵy Jambyl gýmanıtarlyq kolledjiniń stýdenti Áshimjan Jánibek, birinshi júldeli oryndy shýlyq Bodaýbek Aıkún, ekinshi oryndy Jambyl aýdanynan Baqytuly Orynbasar, úshinshi oryndy T.Rysqulov aýdanynyń úmitkeri Qojabergen Arýjan ıelendi. Sonymen qatar, ár janr boıynsha da úmitkerler nomınasııalarmen marapattaldy.
«Proza oqý úzdigi» nomınasııasynda moıynqumdyq Meldesh Áıgerim úzdik atansa, dramalyq shyǵarmalardy oryndaýdaǵy sheberligi úshin talastyq Seıdaly Shapaǵattyń jáne «Mánerlep oqý sheberi» nomınasııasy merkilik Yntyqbaı Veneranyń oryndaýynda boldy.
Barlyq qatysýshylar uıymdastyrýshylar tarapynan dıplomdar men baǵaly syılyqtarǵa ıe boldy.
Oralhan Dáýit.
Derek, sýret: egemen.kz