ASTANA. 28 naýryz. Ázerbaıjannyń belgili akteri ári rejısseri, halyq artısi, professor, ǵylym doktory Tofıg Ismaılov 25 naýryz kúni 77 jasynda qaıtys boldy. Bul Trend Life aqparyna silteme jasaǵan egemen.kz habarlady.
Tofıg Ismaılov 1939 jyly 6 sáýirde Bakýde týǵan. Ázerbaıjan memlekettik óner ınstıtýtynyń akterlik fakýltetin bitirgen. Keıin Máskeýde joǵary rejısserler kýrsynda oqyǵan. 1969-1988 jyldary «Ázerbaıjan» kınostýdııasynda jumys istedi, 1971 jyldan óner ınstıtýtynda rejıssýradan sabaq berdi, al 1988-1994 jyldary sonda kafedra basqardy. 1994-2006 jyldary Túrkııanyń Ystambuldaǵy «Memar Sınan» memlekettik ýnıversıtetinde sabaq berdi. Osynda júrip «Túrki halyqtary kınosynyń tarıhy» degen ensıklopedııa jazyp shyqty. Buǵan Ázerbaıjan, О́zbekstan, Qazaqstan, Qyrǵyzstan, Túrikmenstan jáne Túrkııa kınolary týraly maǵlumattar engizildi.
Ázerbaıjanda Mehtı Gýseınovtiń «Absheron» romany boıynsha birinshi úsh serııaly fılm túsirgen. Ol budan basqa taǵy «Bizdiń qalanyń tastary», «Mýzyka muǵalimi», «Aıryqsha jaǵdaı», «Men án shyǵardym» degen kartınalardy qoıdy. Al «Qıyn joldar» degen lentasy AQSh-ta keńestik 17 úzdik fılmniń biri retinde kórsetildi. Jastar taqyrybynda «Bizdiń mahallanyń jigitteri», «Lahydj», «Chovgan oıyny» degen kartınalar túsirdi.
T. Ismaılov akter retinde de birqatar fılmderge qatysqan. Solardyń arasynda «Aýa hramy», «Oteldegi bólme», «Ystambul reısi» jáne taǵy basqalary bar.
Talǵat Raıymbek.
Derek, foto: Trend Life.