«Astana arlandary» kásipqoı boks klýby Búkilálemdik boks serııasynyń altynshy maýsymdaǵy kezekti jekpe-jegin Petropavl qalasynda ótkizip, muhıt asyp kelgen «Puerto-Rico Hurricanes» komandasymen qolǵap túıistirdi. Boks dese, ishken asyn jerge qoıatyn soltústikqazaqstandyq jankúıerlerdiń bul kúndi taǵatsyzdana kútkeni sonshalyq, «Jeńis» sport mektebiniń atshaptyrym zalynda tize búger oryn tabylmaǵandyqtan, bylǵary qolǵap sheberleriniń sharshy alańdaǵy jan alysyp, jan berisken aıqasyn túregep turyp tamashalaǵandarda esep bolmady.
Oıyn bastalar aldynda BAQ ókilderine bergen suhbatynda komandanyń bas dırektory, London Olımpıadasynyń chempıony, barker kýbogynyń ıegeri Serik Sápıev maýsymaralyq úziliste komanda quramyna ózgerister engenin jetkizdi. Bas bapkerliktiń tizgini respýblıkanyń eńbek sińirgen jattyqtyrýshysy Nurlan Aqúrpekovke senip tapsyrylǵan. Osynda el namysyn abyroımen qorǵap júrgen ulttyq komandanyń kóshbasshy boksshylary Rıo-de-Janeıroda kútip turǵan Olımpıadaǵa tas-túıin daıyndyqqa qyzý kiriskendikten, jańa quramaǵa 30 boksshy qabyldanyp, bolashaǵynan mol úmit kúttiretin jastarmen tolyqqan.
Astanalyqtardyń sheshýshi aıqasqa tyńǵylyqty ázirlikpen kelgeni birden baıqaldy. Olaı deıtinimiz, 23 qańtarda shymyldyǵy ashylǵan baıraqty básekeniń alǵashqy oıynynda kúshti komandalardyń biri Ázerbaıjannyń «Baký ottaryn» tize búktirgenimen, dodada birinshi ret óner kórsetken ózbek aǵaıyndarǵa ese jiberip alǵan. Osy joly jeńiske jetse, pleı-off týrnırine joldama almaq. Mine, sharshy alańǵa 49 kılo salmaq dárejesi boıynsha Mardan Berikbaev pen Djon Ortıs kóterilip, jurtshylyq taǵatsyzdana kútken mártebeli matchtyń alǵashqy jekpe-jegi bastalyp ketti. Qarsylasynan boıy da, qoly da uzyndaý qazaqstandyq osy artyqshylyǵyn á degennen utymdy paıdalanyp, soqqylaryn údetti. Shabýylyn kútip alyp ta, qorǵana júrip te upaı sanyn eseleı tústi. Sóıtip, 3:0 esebimen jeńiske jetti. 56 kg salmaqtaǵy Nursultan Kósheǵulov Edgardo Oskar Rolon Varelamen qolǵap túıistirgende, demimizdi ishke tartqanbyz. Tapaltaq boıly, myǵym deneli onyń urymtal tustardy múlt jibermeıtin shapshań qımylynan seskengenbiz. Birneshe soqqysyn darytyp úlgerdi. Alaıda, ekinshi raýndtyń sońynda Nursultannyń qaq mańdaıǵa týralaǵan soqqysy sharshy alańnyń qojasy kim ekenin tanytqandaı áser qaldyrdy. Pýertorıkalyqtyń odan arǵy hali belgili boldy. Iаnkarlos Rıveranyń (64 kg) kelmeýi sebepti komanda kapıtany Samat Báshenovtiń enshisine bir upaı buıyrdy. Al Ábilhan Amanqul (75 kg) Raýl Sanches Marteni burysh-buryshqa qýyp júrip sabady desek, artyq aıtqandyq bolmas. Budan keıin Erkin Muhamedjannyń (91 kg) rıngke shyǵýynan túsýi jyldam boldy. Onyń atan túıeni jalp etkizetindeı kúrzi soqqysy Ivan Hoel Rosado Torrestiń talmaý jerine dóp tıdi. Tóreshi esep ashty. Ornynan súıretile turyp, judyryqtasýdy jalǵastyrǵanmen, taǵy bir aýyr soqqydan keıin tehnıkalyq nokaýt jazyldy.
«Puerto-Rico Hurricanes» komandasynyń bapkeri Manýel Pabon byltyr týrnır kestesinde jetinshi oryn alǵan jetistigine toqtala kelip, arlandyqtardyń talassyz taza jeńiske jetkenin moıyndady. Matchtyń uıymdastyrylýyna joǵary baǵa berdi. Saıdyń tasyndaı iriktelgen oǵlandarymyz bapkerlerdiń alǵa qoıǵan tapsyrmasyn múltiksiz oryndap, tamasha oıyn órnegin kórsete bildi. Bul, bir jaǵynan 2 sáýirde О́skemende О́zbekstannyń «Uzbek Tigers» komandasyna qarsy ótkiziletin jarys aldyndaǵy shyńdalý shyńy bolǵany anyq.
О́mir ESQALI,
«Egemen Qazaqstan».
Soltústik Qazaqstan oblysy.
Sýretti túsirgen
Talǵat TÁNIBAEV