QARAǴANDY. 29 naýryz. Qaraǵandy oblystyq tótenshe jaǵdaılar jónindegi departamenttiń basshysy bolyp Ibragım Kúlshimbaev taǵaıyndaldy. Bul týraly vedomstvonyń baspasóz qyzmetine silteme jasaǵan egemen.kz tilshisi habarlady.
Jańa basshyny Qaraǵandy oblystyq tótenshe jaǵdaılar departamentiniń jeke quramyna Ishki ister mınıstrliginiń tótenshe jaǵdaılar komıtetiniń tóraǵasy Vladımır Bekker tanystyrdy.
Ibragım Dáýkesuly Kúlshimbaev Qaraǵandy oblysynyń Nura aýdanyndaǵy Amantaý aýylynda dúnıege kelgen. 1994 jyly Qaraǵandy polıtehnıkalyq ınstıtýtyn «Avtokólik jáne avtokólik sharýashylyǵy» mamandyǵy, ınjener-mehanık biliktiligi boıynsha támamdaǵan.
2004 jyly Reseı tótenshe jaǵdaılar komıtetiniń Azamattyq qorǵanys akademııasyn bitirip, «Azamattyq qorǵaý jedel-taktıkalyq komandalyq-shtabtyq» mamandyǵyn alyp shyqty. Jańa basshy azamattyq qorǵaý salasynda mol tájirıbe jınaqtaǵan. 1995 jyly ınstıtýtty támamdaǵan soń, Semeı oblysyndaǵy áskerı bólimniń tank vzvodynda qyzmet etken.
2009-2013 jyldar aralyǵynda Qazaqstan Respýblıkasynyń Tótenshe jaǵdaılar mınıstrligine qarasty № 52859 áskerı bólimdi basqardy.
Ibragım Kúlshimbaev orman órtterin sóndirýge, Ońtústik Qazaqstanda Syrdarııa arnasyndaǵy Kóksaraı bógetiniń qurylysyn salýǵa, Qaraǵandydaǵy «Besoba» turǵyn úı kesheninde qulaǵan úılerdiń qırandysyn tazalaýǵa, Shyǵys Qazaqstandaǵy Tarbaǵataı aýdanynda bolǵan tasqyn sýdyń zardabyn joıý jumystaryna kómegin tıgizgen.
«Qazaqstan Respýblıkasynyń Qarýly Kúshterine 10 jyl», III dárejeli «Minsiz qyzmeti úshin», «Tótenshe jaǵdaılardyń aldyn alýda jáne joıýda úzdik shyqqany úshin», «Qazaqstan Respýblıkasynyń Táýelsizdigine 20 jyl», «Qazaqstan Respýblıkasynyń Qarýly Kúshterine 20 jyl», sondaı-aq, «Qutqarý operasııalaryna belsendi qatysqany úshin», «Tótenshe jaǵdaılar organdarynyń qurmetti qyzmetkeri» medaldarymen marapattalǵan.
Jańa taǵaıyndaýǵa deıin polkovnık Ibragım Kúlshimbaev Astana qalalyq tótenshe jaǵdaılar departamentiniń basshysy bolǵan.
Qaırat Ábildınov.
Derek, foto: Qaraǵandy oblystyq tótenshe jaǵdaılar jónindegi departamenttiń baspasóz qyzmeti.