Jolaýshylardyń taǵy da úreıin ushyrdy

Keshe Aleksandrııa – Kaır baǵytymen ushyp kele jatqan «Airbus A 320» jolaý­shylar ushaǵyn bir qarýly adam basyp aldy. Ushaq Kıprdiń Larnak áýejaıyna aman-esen qondy. Bortynda 81 adam bolǵan ushaq EgyptAir avıakompanııasyna qaraıdy. Buǵan deıin ushaq bortynda ekıpajdyń jeti múshesi qalǵany, basqa barlyq jolaýshylardyń ushaq bortynan syrtqa shyǵarylǵany habarlanǵan edi. Keıbir málimetter boıynsha, ushaq áýejaıǵa qonǵannan soń, tıisti mekemeler qyzmetkerleri terrorshymen kelissóz júrgizgen. Naqty emes derekterge qaraǵanda, terrorshy bir ózi ǵana áreket etken, onda jarylǵysh zat bolǵan kórinedi. Keıin belgili bolǵanyndaı, jolaýshylar ushaǵyn Kaır ýnıversıtetiniń professory Seıf ad-Dın Mustafa degen basyp alǵan. Úsh partııa jańa koalısııa qurmaq Ýkraına parlamentindegi iri úsh partııa jańa koalısııa quryp, parlament tóraǵasy Vladımır Groısmandy eldiń premer-mınıstri qyzmetine usynýǵa ýaǵdalasty. Bul jóninde úsh partııanyń ókilderi habarlady. Aldyn ala jasalǵan boljam boıynsha, jańa parlamenttik koalısııaǵa Joǵarǵy Radada buǵan deıin seriktes bolǵan premer-mınıstr Arsenıı Iаsenıýktiń partııasy, prezıdent Petr Poroshenkonyń blogy jáne burynǵy premer-mınıstr Iýlııa Tımoshenkonyń «Batkıvshına» partııa­sy kirýi múmkin. Koalısııaǵa kirýden burynǵy odaqtastar – Radıkaldyq partııa men «Samopomosh» reformashyl partııasy bas tartqan sııaqty. Sarapshylar parlamentte jańa koalısııanyń qurylýy Ýkraınada birneshe aıǵa sozylǵan saıası daǵdarysqa núkte qoıýy yqtımaldyǵyn aıtady. Eldegi saıası tartys Ýkraına ekonomıkasyn qoldaý úshin Halyqaralyq valıýta qorynan 1,7 mıllıard dollar nesıe alý týraly kelissózge de kedergi keltirip otyr. Aqıqat nemese jalǵan ekeni belgisiz Memleketaralyq avıasııa komıteti osy jyldyń 19 naýryzynda Rostov mańynda apatqa ushyraǵan «Boıng» ushaǵy ekıpajynyń sońǵy sózderi týraly aqparatty ne naqtylamaı, ne ony joqqa shyǵarmaı otyr. Joǵaryda atalǵan vedomstvo jetekshisiniń kómekshisi Artýr Mýradıannyń málimdeýinshe, Reseıdiń memleketaralyq avıasııa komıteti «Kommersant» basylymyna da, basqa da aqparat agenttikterine «Boıng» ekıpajy músheleriniń arasynda bolǵan sózder jóninde qandaı da bir aqparat bermegen. Ushaqtyń «qara jáshikterindegi» jazýdy «oqý» áli aıaqtalǵan joq. Onyń aldyn ala qorytyndysy bir-eki aptadan soń jarııa etiledi. Budan eki kúndeı buryn «Kommersant» gazeti apatqa ushyraǵan ushaqtyń «qara jáshikterdiń» jazýy ashyldy, onyń qulaýyna ushqyshtardyń qateligi sebep boldy, degen maǵynada aqparat jarııalaǵan edi.

Qysqa qaıyryp aıtqanda:

Ulybrıtanııada Kapkeık atty sıam mysyǵy sálemdeme qorabynyń ishinde segiz kún qamalyp otyrsa da tiri qalǵan. Ol óz ıesiniń Batys Sýsseks aımaǵyna jibermek bolǵan sálemdemesiniń qorabyna kezdeısoq kirip ketken sııaqty. Mysyq segiz kúnde 400 shaqyrym jol júripti. AQSh astanasyndaǵy kongress ótetin Kapıtolıı mańynda atys boldy. «Reıter» agenttigi taratqan aqparatqa qaraǵanda, oq jaýdyrǵandardyń biri sol jerde ustalǵan. Al ekinshisin polıseıler oq atyp jaralaǵan. Ázerbaıjannyń áskerı qolbasshylyǵy Taýly Qarabaq daýly aýdanynda Armenııa áskerılerimen bolǵan qaqtyǵysta eki áskerı qyzmetshi oqqa ushqanyn habarlady. Olar memlekettik shekarany kesip ótpek bolǵan armıan áskerılerin ustaý kezinde qaza tapqan. Brıtanııalyq Sıýzan Braýn degen 65 jastaǵy týrıst ózderi túsip qalǵan porttan ári qaraı attanǵan saıahatshy kemeni qýyp jetpek bolyp, sýda úsh saǵattan astam júzgen. Abyroı bolǵanda, ony balyqshylar baıqap, qutqaryp alypty. Asadtyń bolashaǵy sóz bola bastady Reseılik birqatar aqparat agenttikteriniń taratqan habarlaryna qaraǵanda, AQSh ortalyq barlaý basqarmasynyń basshysy Djon Brennan naýryzdyń basynda Máskeýge kelgen sııaqty. Munda ol Reseıdiń tıisti vedomstvolary jetekshilerimen Sırııa prezıdenti Bashar Asad bıliginiń bolashaǵyna baılanysty máseleni talqylaǵan. Reseılik aqparat agenttikteriniń habarlaýynsha, Djon Brennan «AQSh bıliginiń Sırııadaǵy saıası ózgeristerdi júıeli túrde qoldap kele jatqanyn» atap ótken. Al «Interfaks» agenttiginiń Reseı syrtqy ister mınıstriniń orynbasary Oleg Syromolotovtyń sózine silteme jasaı otyryp habarlaýynsha, D.Brennan Reseı federaldyq qaýipsizdik qyzmetinde kezdesý ótkizgen. Degenmen, mınıstrdiń orynbasary AQSh ortalyq barlaý basqarmasy basshysynyń Máskeýge jasaǵan sapary Reseıdiń Sırııadan áskeriniń bir bóligin áketý jónindegi sheshimine qatysty emes ekendigin aıtqan. Jemqorlyqqa qatysy bar ekenin moıyndady Gondýrastyń eks-prezıdenti, sondaı-aq, fýtbol qaýymdastyǵynyń burynǵy basshysy bolǵan Rafael Kallehas Halyqaralyq fýtbol federasııasyndaǵy (FIFA) sybaılas jemqorlyq qylmystarǵa qatysy bar ekenin moıyndady. Rafael Kallehas FIFA-ǵa baılanysty tergeýde kinásin moıyndaǵan on tórtinshi adam bolyp otyr. Keltirilgen derekter boıynsha,  ol álem chempıonatynyń biliktilik kezdesý oıyndaryn ótkizý jáne sol oıyndardy translıasııalaý quqyǵyn berý úshin para alǵan. Búginge deıin AQSh bıligi FIFA-daǵy sybaılas jemqorlyqqa qatysty 42 tulǵa men uıymǵa aıyp taǵyp otyr. Bir-birine jalǵasqan jáne uzaq jyldardy qamtyǵan qylmystardy tergeý FIFA-nyń qyzmetine, sonymen qatar, ózge de elderdiń fýtbol qaýymdastyqtarynyń jumysyna keri áser etken. Aıta keteıik, osy janjaldar saldarynan FIFA prezıdenti Zepp Blatter men onyń orynbasary Mıshel Platını otstavkaǵa ketken bolatyn. Sodyrlar ındonezııalyq teńizshilerdi kepilge aldy Fılıppınde «Ál-Kaıda» terrorshyl uıymymen baılanysy bar «Abý Saııaf» tobynyń sodyrlary júk kemesine shabýyl jasap, ekıpajdyń on múshesin kepilge aldy. Eldiń syrtqy ister mınıstrliginiń resmı ókili Armanata Nasırdiń málimdeýinshe, kepilge alynǵan adamdar Indonezııanyń azamattary bolsa kerek. Al oqıǵa jeksenbi kúni  bolǵan. Júk kemesi Borneo aralynan Fılıppınge kómir apara jatqan jolda shabýylǵa ushyrapty. Keıbir aqparattarǵa qaraǵanda, shabýyl jasaǵandar keme ekıpajynyń múshelerine aldy­men ózderin ekstremıstik toptyń adamymyn dep ataǵan bireý baılanysqa shyqqan kórinedi. Álgi adam kemedegilerdi bosatý úshin bir mıllıon dollar kóleminde aqsha talap etken. «Ál-Kaıda» uıymymen baılanysy bar «Abý Saııar» toby Fılıppınniń ońtústik bóliginde ornalasqan eken. Internet materıaldary negizinde ázirlendi.