Men Nursultan Ábishuly Nazarbaevtyń byltyrǵy 30 qarasha kúngi «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna Joldaýyn úlken qanaǵattanǵandyq sezimmen tyńdaǵan edim. Eki saǵatqa jýyq sozylǵan Prezıdenttiń sózi árbir kórermenniń sanasyn jaýlaǵan bolar. О́zim eshnársege alańdamastan, Elbasynyń árbir sózine mán berdim. «100 naqty qadam» Ult Josparymen tonnyń ishki baýyndaı qabysyp jatyr eken. Aıtylǵan máselelerdiń bári halyq úshin, respýblıkanyń jańa týǵan balasynan eńkeıgen kárisine deıingi turǵyndardyń qamyn oılaǵan qamqorlyqqa qalaı tánti bolmassyń.
Júrekke óte jaqyn, jan-júıeńdi baýrap aıtylǵan sózderge búkil bolmysymmen rızashylyq seziminde bolǵanym kúni keshegideı esimde. Prezıdenttiń sonshama logıkalyq tereńdikpen baıandaǵan Joldaýy qulaqqa jaǵymdy jyrdaı estilgenin de umyta alar emespin. Elbasynyń sheshendiginiń ózi adamdy eriksiz baýrap alatynyn qaıtersiz.
Kóp másele qamtyldy. Men óz pikirimdi aıtylǵan bir jaıǵa ǵana aýdarmaqpyn. Prezıdenttiń kásiptik oqý jónindegi oılary óte tamasha. Kásiptik-tehnıkalyq kolledjderdi kóbeıtýdi qozǵaǵany jurt júreginde júrgen jaılar edi. Muny Nursultan Ábishuly dóp basty.
Men óz basym pedagog retinde oılap-tolǵanyp júrgen jaılarym kóp edi. Solardyń biri – barlyq joǵary oqý oryndarynda qarjygerler men zańgerlerdiń barlyq ýnıversıtetterde, kolledjderde jappaı oqytylyp kele jatqany. Myńdaǵan qarjyger men zańger jumysty qaıdan tabady, bárine jumys jetpeıdi ǵoı. Al jumys jetpegen soń, bos salpaqtap júredi.
Prezıdenttiń aıtqanyndaı, bárine joǵary bilim jetpeıdi. Oqýǵa túse almadyń ba, birden kolledjge barý kerektigi óte oryndy aıtyldy. Olarǵa oqýdyń tegin bolatyndyǵy tipti jaqsy.
Joǵary bilimge umtylǵan jastarymyzdyń jumysshy mamandyǵy bolmaǵandyqtan, ártúrli jumystardy sheteldikter atqarýda. Eger bizdiń jastarymyz kirpish qalaýshy, aǵash sheberi, elektrmen dánekerleýshi, elektrshi, shofer, traktorshy, burǵyshy, boıaýshy-syrlaýshy, radıst, jol tóseýshi, slesar, tokar jáne t.b. mamandyqtardy meńgerse, murttaryn balta shappas edi. О́zderin materıaldyq qamtamasyz etýge, otbasyn asyraýǵa, qart ata-analaryna kómektesýge zor múmkindigi bolar edi. Máseleniń osy jaǵyna osy kezden basa mán bermesek bolmaıdy. Men jastarǵa mektepti 9-shy synyppen támamdap, kolledjge túsýdi usynys eter edim. Sebebi, kolledjde de orta bilim alynady. Alǵan mamandyǵy ózine olja, joǵary oqý ornyna umtylys jasaı berýge de bolady. Túse almasa, alǵan mamandyǵy boıynsha jumys isteıdi, dalada qalmaıdy. Bilimiń, daıyndyǵyń bolsa, joǵary oqý ornyna árqashan esik ashyq.
Nursultan Ábishulynyń mamandyqty ıelenip, jumysshy bolý eń qurmetti, árqashan abyroı ákeletin eńbek ekendigin aıtqany óte oryndy. О́ıtkeni, Elbasynyń ózi de eńbek jolyn qarapaıym jumysshydan bastady emes pe?! Endeshe, kim-kimge de osylaı isteýge bolady. Áıtpese, jumysshy bolyp qalsań nesi aıyp.
Qadyr JÚSIP,
H.Dosmuhamedov atyndaǵy
Atyraý memlekettik ýnıversıtetiniń professory.
Atyraý.