Baıtaq Otanymyzdaǵy myńdaǵan mektepterdi bitirgeli otyrǵan túlekterdiń kókeıindegi bir ǵana suraq, bıyl UBT qalaı óter eken, ne jańalyǵy bar eken degenge saıatyny belgili.
Bul týraly Bilim jáne ǵylym mınıstrligi taıaýda osyǵan qatysty baılamyn taratty. Oǵan kóńil aýdarar bolsaq, ústimizdegi jyly test tapsyrý merzimi maýsym aıynyń 1-i men 15-i aralyǵynda ótedi eken. Emtıhan talabynda kórsetilgen shekti deńgeıdegi baldy jınaı almaǵan bitirýshiler úshin aǵymdaǵy jyly múddelilerge taǵy bir múmkindik jasalmaqshy. Ol boıynsha aldaǵy tamyz aıynda barlyq oblys ortalyqtary men Astana jáne Almaty qalalarynda ornalasqan bazalyq joǵary oqý oryndarynda úmitkerler úshin testileýdi qaıta ótkizý kózdelip otyr.
Osy arada myna bir máseleni jurtshylyqtyń nazaryna sala ketelik. Ulttyq biryńǵaı testileýdi qaıta tapsyrýǵa bolatyn joǵary oqý oryndarynyń tizimi mınıstrliktiń tarapynan aıqyndalady eken. Alda aıtqan shekti deńgeıdi jınaı almaǵan túlekter testileý kezinde 4 pán boıynsha baqtaryn synaıdy. Ol pánderdiń qatarynda birinshi – oqytý tili, ekinshi – Qazaqstan tarıhy, úshinshi – matematıka, tórtinshi – tańdaý páni, bul beıindi dep te atalady. Testileýge ekinshi ret qatysatyn talapker synaqqa qatysý úshin qandaı qujattar ázirleý qajet degenge berer jaýap: turǵylyqty jerine qaraı jaqyn ornalasqan bazalyq joǵary oqý oryndaryna óziniń ótinishin berip, oǵan qosa 3h4 sýretin jáne orta mektepti nemese tehnıkalyq jáne kolledj bitirgendigi týraly qujattaryn tapsyrsa bolǵany. Qaıta testileý rásimine qatysyp, synaq tapsyratyn talapkerler 2 242 teńge tóleıtinin de nazarǵa sala ketsek deımiz. Bul joǵary oqý oryndarynda oqýǵa nıet etken jastarǵa jasalyp otyrǵan mol múmkindik dep bilemiz. Jalpy, keıbir bilim uıalary, ıaǵnı mektepter ózderiniń bedelin oılap, kóp jaǵdaıda nashar oqıdy degen túlekterdi testileýge jibermeıtin ádet birazdan beri jalǵasyp keledi. Bıyl osy másele óz sheshimin taýyp, umtylǵan jasty UBT-ǵa jiberý jaǵyn, oqýshyny alalamaı qatań eskersek, quba-qup bolar edi. Nashar deıtin túlek te sol bilim ornynyń, muǵalimderiniń «jemisi» emes pe?
Súleımen MÁMET,
«Egemen Qazaqstan».