Teledıdarda, kúndelikti gazet-jýrnalda da mas kúıinde rólge ıe bola almaı, jol-kólik apatyna ushyraýshylar týraly kóp aıtylyp, jazyldy. Al adam ólimine ákelip soqtyratyn osyndaı apatqa jol bergenderdi birer jylǵa ǵana sottap jatyr. Sonda da balalar men azamattarymyzdyń ómirin qıyp jatqan mundaı jol apaty oqıǵalarynyń sany azaıar emes.
Jol-kólik apatyna jol berip, adam ólimine sebepshi bolǵan masań júrgizýshiler nebári 3 nemese 5 jylǵa bas bostandyǵynan aıyrylady eken. Keıde sottar mundaı júrgizýshilerdi 2-3 jylǵa júrgizýshilik kýáliginen de aıyryp jatady. Árıne, mundaı sheshim azdyq etedi. Qazirgi zamanda júrgizýshilik kýálikti satyp alý túkke de turmaı qaldy. Keıde ony aǵaıyn-týmalary jınalyp, syıǵa da tartady. Demek, meniń paıymymsha, adam ólimine dýshar etken júrgizýshilerge munan da qatań shara qoldanylsa, onda 3-4 jylda osyndaı oqıǵalar sany 20-30 paıyzǵa deıin azaıar edi. Qaıǵyly jaǵdaıǵa ushyraǵan otbasylardyń basyndaǵy qıynshylyqtardy kórgende eriksiz birge qınalasyń. Jol-kólik apatynan o dúnıelik bolǵandardyń otbasyn oılap jatqan jan joq. Sondyqtan, osy máseleni búkil halyq bolyp talqylaǵandy oryndy dep taýyp otyrmyn. Bul rette Parlament depýtattary osyndaı adam ólimin azaıtý jolyndaǵy talqylaryn ótkizse jáne osy máseleniń ońtaıly sheshimin taýyp, zańǵa ózgerister engizý sııaqty naqty usynystarymen shyǵyp jatsa, jón bolar edi.
Erdahmet DOSTEMESULY,
eńbek ardageri.
Jambyl oblysy,
Moıynqum aýdany.