Bıyl barsha elorda oqyrmandary úshin Ulttyq kitaphanada «Bul kitap álemi...» atty kitap aılyǵy bastalǵanyn habarlaǵan bolatynbyz. Onyń aıasynda kitaphana ujymy 62 is-shara ótkizgeli jatqanyn da jetkizdik. Sonyń alǵashqysy keshe ótti. Dálirek aıtsaq, jazýshy, halyqaralyq «Alash» ádebı syılyǵynyń laýreaty, Qazaqstannyń eńbek sińirgen qaıratkeri Shárbaný Beısenovamen kezdesý keshi boldy.
Ol kisi Qazaq memlekettik ýnıversıtetin 1969 jyly bitirgen. Eńbek jolyn respýblıkalyq «Parasat» (burynǵy «Mádenıet jáne turmys») jýrnalynda 1968 jyly ádebı qyzmetkerlikten bastap, keıin bólim meńgerýshisi boldy. 1980 jyly «Qazaqstan áıelderi» jýrnalyna bólim meńgerýshisi bolyp aýysty. Qazaqstan Respýblıkasy Aqparat mınıstrliginiń Baspa isteri jónindegi departamentinde bas maman ári jańadan jaryq kórgen kitaptardy nasıhattaýmen aınalysqan. «Qazaq ádebıeti» gazetinde «Kitap álemi» qosymshasynyń redaktory bolǵanyn da esterińizge sala ketsek deımiz.
Alǵashqy áńgime, novellalary oblystyq «Dıdar» (burynǵy «Kommýnızm týy») gazeti men «Qazaqstan áıelderi» jýrnalynda turaqty jarııalanyp turǵan. Tól týyndylarymen qatar aýdarmamen de aınalysqan. Solardyń ishinde, Ýkraın jazýshysy V.Drozdyń, eston E.Ermanovtyń, ázerbaıjan Anardyń, latysh D.Rýkshaneniń, armıan jazýshylarynyń jekelegen shyǵarmalaryn, X.Andersenniń ertegilerin, latynamerıkalyq qalamger J.Amadýdyń «Qum jaǵalaýdyń kapıtandary» atty romanyn qazaq tilinde sóıletken de osy kisi. Jazýshy kezdesý barysynda óziniń týyndylaryna keńinen toqtalyp, olardyń dúnıege kelýine túrtki bolǵan túrli jaǵdaılardy oqyrman qaýymmen bólisip, áserli áńgimeleri arqyly keshtiń kórkin kirgize tústi. Solardyń qatarynda, «Sezimtal júrek», «Taǵylymdy taǵdyrlar», «Toıǵa kelgen kelinshek» sııaqty shoqtyǵy bıik shyǵarmalary arqyly Shárbaný Beısenova óz oqyrmanyn tapqan. Jıyndy aqyn Marjan Ershý júrgizip, ádebıet álemindegi názik jandylar, olardyń eńbekteri jaıly syr shertti.
«Shárbaný – ótken ǵasyrdyń 70-jyldarynyń orta tusynda shyǵarmashylyq ómirin jýrnalıstıkadan bastap, birtindep ádebıetke kelgen, qalam qyzmetin sypaıy bastap, ádepti minezben, daýryqpasyz jalǵastyryp kele jatqan búgingi kórnekti jazýshylarymyzdyń biri», – degen akademık Serik Qırabaev. Árıne, biz de bul pikirmen tolyq kelisemiz. Kezdesý keshinde osy oıymyzdy odan saıyn naqtylaı túskendeı boldyq. Shyǵarmashylyq adamy úshin jazylǵan dúnıesi tasada qalmaı, oqyrmany izdep jatsa, odan asqan baqyt joq ta shyǵar.
Raýan QAIDAR,
«Egemen Qazaqstan».