«Batyr arýlar» baıqaýy

Oǵan daýys berý bastaldy Qazaqstandyqtardyń el Qarýly Kúshterinde qyzmet etip júrgen áskerı kásip ıe­leriniń 12 úzdik ókilin ózderi tańdaýyna jaqsy bir múmkindik týyp otyr. Jaqynda «Batyr arýlar» baıqaýynyń qatysýshylaryna onlaın daýys berý bastaldy. Daýys berý Qorǵanys mınıstrliginiń www.mod.gov.kz. resmı saıtynda ótkizilýde. Onyń qorytyndysy boıynsha QR Qarýly Kúsh­teri áskerı kásip ıeleriniń 12 úzdik ókili anyq­talady. Baıqaý Qazaqstandaǵy qyz-kelinshek­terdiń áskerı qyzmetin jarııa etý úshin Qor­ǵanys mınıstrliginiń bastamasy boıynsha uıymdastyrylyp otyr. 2016 jyly «Batyr arýlar» baıqaýyna 200-den asa ótinim qabyldandy. Onyń ishinde baıqaýdyń tehnıkalyq talaptaryna sáıkes kelgen 80 saýaldama irikteldi. «Batyr arýlar» baıqaýy – bul qoǵam úshin jaqsy rezonans týǵyzǵan áıel áskerı qyzmetshiler arasyndaǵy tuńǵysh respýblıkalyq baıqaý. Áskerı qyzmet – men úshin mártebe jáne maqtanysh sezimi, biz erlermen birge ıyq teńestire otyryp, ómirimizdi Otanǵa qyzmet etýge arnadyq. Men bul baıqaýdyń uıymdastyrylyp, ótkizilýine muryndyq bolǵan Qorǵanys mınıstrliginiń basshylyǵyna sheksiz alǵysymdy bildiremin», – dedi «Batyr arýlar-2015» baıqaýynyń jeńim­pazy aǵa leıtenant Álııa Haırýlına. Baıqaý qatysýshylaryna júktelgen tapsyrmalardy sátti oryndaı alatynyn, sondaı-aq, dalalyq jaǵdaılarda jaýyngerlik aıla-tásilder men sabaqtardy ótkize alatynyn dáleldeýge týra keledi. «Atalǵan baıqaý men úshin mańyzdy boldy. Bul – basqa baıqaýlardan erekshelenetin áskerı qyzmetshiler arasyndaǵy birden-bir konkýrs. Osynaý baıqaýda men tájirıbe jınaqtap, dene daıarlyǵymnyń qandaı deńgeıde ekenin ańǵardym. Men barlyq konkýrsanttarǵa sáttilik jáne jeńis tileımin», – dedi «Batyr arýlar-2015» baıqaýynyń jeńimpazy serjant Botagóz Musaeva. Baıqaýdyń negizgi mindeti Qazaqstandaǵy áıelderdiń áskerı qyzmetiniń oń ımıdjin qalyp­tastyrý, áskerı kásiptiń bedelin arttyrý bolyp tabylatynyn esterińizge sala keteıik. Tuńǵysh baıqaýdyń qatysýshylary ártúrli kedergilerdi eńserdi, qarýmen ýaqytqa tolyq jaýyngerlik amýnısııada júzdi, dene daıarlyǵyn kórsetti, dalalyq jaǵdaılarda jaýyngerlik aıla-tásilder men jattyǵýlardy oryndady. Jeńimpazdar «aman qalý kýrsy boıynsha» qarqyndy jaýyngerlik daıar­lyqtan ótti, tanktiń astynan jerbaýyrlap jyljyp, parashıýtten sekirdi jáne oq atty. Áskerı qyzmetshiler udaıy ázirlikte ekenin jáne olarǵa júktelgen tapsyrmalardy sátti oryndaıtynyn dáleldedi. «Egemen-aqparat».