ASTANA. 13 sáýir. Qazaqstan Prezıdenti Nursultan Nazarbaev Túrkııa Respýblıkasynyń prezıdenti Redjep Taııp Erdoǵanmen kezdesti. Bul týraly akorda.kz-ke silteme jasaǵan egemen.kz tilshisi habarlady.
Nursultan Nazarbaev pen Redjep Erdoǵan kezdesýde Túrkııa prezıdentiniń Qazaqstanǵa byltyr sáýirdegi saparynda qol jetken ýaǵdalastyqtardyń júzege asyrylý barysyn qarastyrdy.
Sondaı-aq, eki el kóshbasshylary saýda-ekonomıka, ınvestısııa, aýyl sharýashylyǵy jáne mádenı-gýmanıtarlyq salalardaǵy yntymaqtastyqty nyǵaıtý máselelerin talqylady. Bul baǵyttarda birlesken perspektıvaly jobalar bar ekeni, olardy júzege asyrýǵa eki eldiń shaǵyn jáne orta bıznes ókilderi qatysa alatyny aıtyldy.
Memleketter basshylary halyqaralyq kún tártibindegi ózekti máseleler men terrorızmge jáne ekstremızmge qarsy kúres aıasynda qabyldanyp jatqan sharalar jóninde pikir almasty.
Qazaqstan Prezıdenti bıyl naýryz aıynda Ankarada bolǵan terrorlyq aktige baılanysty Redjep Erdoǵanǵa taǵy da kóńil aıtty.
Ekijaqty qarym-qatynas máselesine toqtalǵan Memleket basshysy Túrkııanyń jetekshi kompanııalary men holdıngteriniń memleketimiz tarapynan eleýli qarajat bólinip otyrǵan ındýstrııalyq-ınnovasııalyq damý jáne «Nurly jol» baǵdarlamalaryn júzege asyrýǵa belsene qatysa alatynyna nazar aýdardy.
Memleket basshysy Qazaqstannyń Dúnıejúzilik saýda uıymyna kirýi taýar aınalymyn, sonyń ishinde Túrkııamen aradaǵy taýar aınalymy kólemin arttyrý úshin elimizdiń aldynan zor múmkindikterge jol ashatynyn aıtty.
Qazaqstan Prezıdenti bizdiń respýblıkamyzdyń tranzıttik-kóliktik áleýeti joǵary ekenin, ony eki el ekonomıkasynyń ıgiligine tıimdi paıdalanýǵa bolatynyn atap ótti.
Sonymen qatar, Memleket basshysy Antalıada «EKSPO-2016» jáne Astanada «EKSPO-2017» kórmesin ótkizý turǵysynan Qazaqstan men Túrkııanyń tájirıbe almasýy mańyzdy ekenine nazar aýdardy.
Redjep Erdoǵan birqatar baǵyttar boıynsha alǵa qoıylǵan maqsattarǵa jetý úshin ekijaqty yntymaqtastyqty odan ári nyǵaıtý qajettigin aıtty.
Talǵat Raıymbek.
Derek, foto: akorda.kz.