ASTANA. 14 sáýir. Búgin fýtboldan ÝEFA Chempıondar lıgasynyń shırek fınaldyq matchtary odan ári jalǵasty. Bul týraly egemen.kz tilshisi habarlady.
«Atletıko» (Madrıd, Ispanııa) – «Barselona» (Barselona, Ispanııa) 2:0 (1:0)
Keshe Madrıd aspanynda túni boıy «Realdyń» jeńisiniń býy basylmaı jatqanda qalanyń ekinshi shetinde jergilikti «Atletıko» komandasy da jankúıerlerine taǵy bir qýanysh syılady. «Atletıko» ÝEFA Chempıondar lıgasynyń shırek fınalynda Ispanııa chempıonatyndaǵy ejelgi qarsylastarynyń biri sanalatyn «Barselona» klýbyn jeńip, jartylaı fınalǵa shyqty.
Bul jeńisti shyny kerek, burynnan fýtbolmen «aýyratyn» jankúıerlerdiń ózi kútpedi. Olaı deıtinimiz, álemniń túkpir-túkpirinde «Atletıko» jeńedi-aý degen adamdarǵa qaraǵanda katalondyq komandanyń jeńisine bás tikken adamdar kóp bolǵan. Alaıda, sport degen bir sıqyr álem jasyl alańda ǵana shyn myqtynyń anyqtalatynyn kórsetti.
Kezdesý asa tartysty ótti. Onda «Atletıkoǵa» alań ıesi retinde jankúıerlerin jerge qaratpaý úshin Barselonada ketken eseni qaıtaryp, taza eki dop aıyrmashylyǵymen jeńý kerek bolatyn. Alań ıeleri osy maqsatpen alańǵa shyqty. Argentınalyq talantty fýtbolıst, qazir birneshe jyldan beri «Atletıkonyń» bas jattyqtyrýshysy qyzmetin abyroımen atqaryp júrgen Dıego Pablo Sımeone oıynshylaryn taǵy bir ret qaırap, alańǵa «batasyn» berip shyǵardy. Bul oıynda «Atletıko» barlyq qyrynan kórindi. Olar qorǵanysta ta shabýylda da argentınalyq mamannyń taktıkasyn ustanyp, «Barselonadan» basymdyq tanytty.
Matchta birinshi bolyp esepti alań ıeleri ashty. 36 mınýtta shabýylshy Antýan Grızmann qarsy jaqtyń aıyp dop alańyna áýeletip berilgen pasty paıdalanyp, baspen dopty torǵa toǵytty. Osydan keıin oıyn boıy «Barselonanyń» Neımar, Sýares, Inesta, Messı men basqa da oıynshylary qaýipti shabýyldar uıymdastyrǵanymen odan eshteńe shyqpady. Oǵan qaraǵanda, «Atletıkonyń shabýyldary nátıjesin berip jatty. Sondaı shabýyldardyń birinde «Barselonanyń» aıyp dop alańyna jaqsy pas shyǵarylǵanda Inesta dopty qolmen toqtatyp qaldy. Soǵan tóreshi Rısollı Nıkola kóp oılanbastan «Barsanyń» qaqpasyna birden 11 metrlik penaltı berdi. Bul penaltıdi Antýan Grızmann sheberlikpen oryndady. Esep – 2:0. Osy goldan keıin «Barsa» esin jıyp, taǵy birneshe ret qaýipti jaǵdaı jasady. Leonel Messıdiń alystan shirene tepken doby da jaǵdaıdy qutqara almady. Sóıtip, Ispanııa chempıonatynda «Barselonanyń» ókshesin basyp ekinshi orynda kele jatqan «Atletıko» ejelgi qarsylastarynyń birin ÝEFA Chempıondar lıgasynan shyǵaryp saldy.
ÝEFA Chempıondar lıgasy 1/4 fınalyndaǵy qarsylastardyń ekinshi matchtary.
14 sáýir. Madrıd. «Vısente Kalderon» stadıony.
Tóreshi: Rısollı Nıkola
«Atletıko M»: Oblak, Hýanfran, Godın, Lýkas, Lýıs, Koke, Aýgýsto (Savıch 90’), Gabı, Nıges, Ferreıra-Karrasko (Tomas74’), Grızmann (Korrea 90’)
«Barselona»: Ter Shtegen, Alves (Arda 64’), Pıke, Maskerano, Alba, Rakıtıch (Roberto 64’), Serhıo, Inesta, Messı, Sýares, Neımar
Goldar: Antýan Grızmann 36’, 88’
Eskertý aldy: Gabı 69’, Godın 85’ , Korrea 90’ , Koke 90’ — Sýares 70’ , Neımar 76’ , Inesta 87’ , Arda 90’
«Benfıka» (Lıssabon, Portýgalııa) – «Bavarııa» (Mıýnhen, Germanııa) 2:2 (1:1)
Bul kezdesý teń eseppen aıaqtalǵanymen, «Bavarııa» eki oıynnyń nátıjesi boıynsha jartylaı fınalǵa shyqty. Birinshi matchta Germanııa klýbynyń jalǵyz soqqan goly ekinshi oıynnyń taǵdyryn sheshti. Sóıtip, «Bavarııa» ataǵyna shań jýytpaı, taǵy da Chempıondar lıgasynyń kýbogyna dámeli ekenderin kórsetti.
Kezdesýde alań ıeleri de jaqsy oınady. Olardy sol úshin de maqtaýǵa bolady. Birinshi matchta 1:0 esebimen jeńilgenimen, «Benfıka» qoldy bir silteı alatyn komanda emestigin tanytty. Oıynda birinshi bolyp goldy da portýgaldyqtar soqty. 27 mınýtta Raýl Hımenes qaqpashydan aılasyn asyra aldy. Osy gol «Bavarııaǵa» bir shapalaq bolyp tıgendeı kórindi. Odan keıin olar tez esin jıyp, «Benfıkanyń» qaqpasyna eki gol soǵyp, alǵa shyqty. 38 jáne 52 mınýttarda Artýro Vıdal men Tomas Mıýller goldardyń avtory atandy. Bul goldan keıin «Benfıkanyń» jaǵdaıy qıyndaı tústi. О́ıtkeni, olarǵa jartylaı fınalǵa shyǵý úshin endi eki gol emes, úsh dop soǵý kerek boldy. Alaıda, alań ıeleriniń shamasy tek bir gol soǵýǵa ǵana jetti. «Benfıka» esepti matchtyń bitýine 15 mınýt qalǵanda ǵana teńestire aldy.
Endi jartylaı fınalda «Real» (Madrıd) men «Bavarııa» (Mıýnhen), «Atletıko» (Madrıd) men «Manchester Sıtı» (Manchester) komandalary kezdesedi.
14 sáýir. Lıssabon. «Eshtadıý da Lýsh» stadıony.
Tóreshi: Keıpers Born
«Benfıka»: Ederson, Almeıda, Lındelef, Jardel, Elızeý (Iovıch 88’), Feısa, Sanches, Salvıo (Talıska 68’), Pıssı (Gýedesh 58’), Karsela-Gonsales, Hımenes
«Bavarııa»: Noıer, Lam, Kımmıh, Martınes, Alaba, Vıdal, Alonso (Bernat 90’), Alkantara, Kosta, Mıýller (Levandovskı 84’), Rıberı
Goldar: Hımenes 27, Talıska 76’– Vıdal 38’, Mıýller 52’
Eskertý aldy:Karsela-Gonsales 70’, Almeıda 90’ – Martınes 74’
Dastan Kenjalın.
Derek, foto: eurosport, euro-football.ru
Vıdeo: vkontakte áleýmettik jelisi.