ASTANA. 6-14 sáýir aralyǵynda Mońǵolııanyń Ulan-Bator qalasynda shahmattan jasóspirimder arasynda ótken Azııa chempıonatynda Qazaqstan shahmatshylary bir altyn, eki kúmis medaldi jeńip aldy. Bul týraly egemen.kz tilshisi habarlady.
12 jasqa deıingi qyzdar arasynda baq synaǵan Nazerke Nurǵalı rapıdten 7 týr boıynsha 6,5 upaı jınap, Azııa chempıony atansa, klassıkadan 9 týrdan 7,5 upaımen kúmis júldeni ıelendi. 14 jasqa deıingi qyzdar arasynda Ásel Serikbaı blısten 7 týr boıynsha 5,5 upaı jınap, ekinshi oryndy ıelendi.
Chempıonatta Qazaqstannan qatysqan 11 sportshynyń ishinde úsheýi júldeli oryndardy ıelense, sonyń ekeýi Qyzylorda oblysynyń shahmatshylary.
Azııa dodasyna 19 memleketten 470 sportshy qatysty.
Endi Ásel Serikbaı qyrkúıek aıynda Reseıdiń Hanty-Mansıısk qalasynda, Nazerke Nurǵalı qazan aıynda Grýzııanyń Batýmı qalasynda bolatyn álem chempıonatyna qatysady.
Dastan Kenjalın.
Derek, foto: Shtattaǵy ulttyq komandalar jáne sport rezervi dıreksııasy.