Qytaıdyń poshta markasynda beınelendi
Shyńjandyq jas qazaq ánshi Araı Aıdarqanuly Qytaıdyń poshta markasyna shyqty. Jańalyqty ánshiniń aǵasy Arys Aıdarqanulynyń aqpary boıynsha Qytaı qazaqtary senkazakh.com saıtynyń qoldanýshylary habarlady.
Araı Aıdarqanuly – Qytaıǵa tanymal qazaq ánshisi. Onyń óneri Qazaqstanǵa da tanys. Ol Altaıdyń ar jaǵynda ótetin kóptegen konkýrstarǵa qatysyp, baq synasyp keledi. Sonyń ishinde byltyr ánshi tórt aı boıy ótken «Qytaı eliniń armany» baıqaýyna qatysyp, án jarysynyń sońǵy máresine deıin jetken.
Araı 1989 jyly Qytaı Halyq Respýblıkasynyń Altaı ólkesindegi Kóksaz aýylynda týǵan. Atasy aýmaly-tókpeli zamanda Semeıden Qytaıǵa kóship barǵan eken. Sodan keıin úrim-butaǵymen Tarbaǵataıdyń tústik betinde qalyp qoıǵan. Araıdyń ákesi Aıdarqan Qabdollauly – Qytaıǵa ǵana emes, Qazaqstanǵa da tanymal adam. Ol kisi kezinde kúrespen aınalysqan. Qytaıǵa belgili sport sheberi, kúresten birneshe dúrkin el chempıony bolǵan. Qazir sporttyń osy túrinen jattyqtyrýshy bolyp jumys isteıdi.
Dastan KENJALIN,
«Egemen Qazaqstan»