Metallýrgter alleıasynda boztorǵaılar án salady
Eýrazııalyq Top (ERG) quramyna enetin oblys ortalyǵyndaǵy «Qazaqstan alıýmınııi» AQ metallýrgter ujymy 20 uıa jasapty. Jas metallýrgter, balalar men jasóspirimder, ekologııa jáne týrızm ortalyǵynyń jetkinshekterimen birlesip, «Sálem, qustar mekeni!» atty naýqandy bıyl osymen besinshi ret uıymdastyrdy.
Qustarǵa, tabıǵatqa degen janashyrlyq sharasy oblys ortalyǵyndaǵy Vorýshın saıabaǵynda bastaldy. Saıabaqty jazda jaqsy ózgerister kútip tur. ERG men oblys ákimdigi arasynda jasalǵan áleýmettik jobalar jónindegi memorandým aıasynda endi abattandyrý jumystary jalǵasady. Sondaı-aq, alıýmınıı zaýyty ujymynyń usynysymen «Metallýrgter alleıasy» ashylady. Al, qustarǵa arnalǵan uıalar abattandyrýǵa jasalǵan alǵashqy bastama deýge bolady.
– Saıabaqty metallýrgterdiń qamqorlyqqa alǵandaryna biraz jyl boldy. Árbir kóktem men kúzde osy baqty zaýyt jumysshylary, qyzmetkerleri retke keltirip, jınalyp qalatyn qoqysty shyǵarady. Búgin biz saıabaqta qustardyń da turaqtap, qalalyqtardyń kóńilin ásem áýenimen qýantyp tursyn degen nıetpen uıalar jasap, ildik, – deıdi «Qazaqstan alıýmınııi» AQ óndiristik qaýipsizdik, ekologııa jáne eńbekti qorǵaý departamenti bastyǵynyń orynbasary Renat Sarlybaev.
Oblys ortalyǵyndaǵy №33 mekteptiń jas tabıǵat zertteýshileri tabıǵat qorǵaýǵa arnalǵan plakattar jazyp, qolóner buıymdaryn jasap ákelipti.
2016 jyl álemde úı torǵaıynyń jyly bolyp jarııalandy. Sońǵy jyldary ornıtologtardyń basym bóligi kóptegen elderde torǵaı sanynyń azaıyp bara jatqanyn aıtýda. Al, torǵaılardyń kóptigi ekojúıede mańyzdy ról atqarady jáne qorshaǵan ortada qalyptasqan jaǵdaıdyń kórsetkishi bolyp tabylady.
Farıda BYQAI,
«Egemen Qazaqstan»
Pavlodar oblysy