Ulttyq mýzeıde Astana mektepteri oqýshylarynyń qatysýymen asyq atýdan ashyq týrnır ótkizýdegi maqsat ulttyq oıyndardy nasıhattap, óskeleń jas urpaqtyń halqymyzdyń salt-dástúrlerin tereń bilip ósýine mol múmkindik týǵyzý dep atap kórsetildi. Ulttyq mýzeı dırektorynyń orynbasary Abaı Satybaldın asyq atý oıynynyń mańyzdylyǵy týraly aıta kelip, kópshilikti qazaqtyń ulttyq oıyndaryn qoldaýǵa úndedi.
– Asyq oıyny negizinen balany mergendikke, ustamdylyqqa tárbıeleıdi. Qazaq: «Qoı asyǵy demeńiz, qolǵa jaqsa saqa tut, jasy kishi demeńiz, aqyly assa aǵa tut» dep beker aıtpaǵan. Ulttyq tárbıe ulttyq oıynnan kelip shyǵady. Keshegi qıyn kezeńderde ulttyq bolmysymyzdyń tamyryna balta shabyla jazdaǵan nebir jónsiz shabýyldardy bastan keshtik. Táýelsiz el bolyp, óz erkimiz óz qolymyzǵa tıgende ata-babalarymyzdan qalǵan qundy muralarymyzdy qaıta jańǵyrtý, nasıhattaý bizdiń basty boryshymyz. Biz bul jobany el Táýelsizdiginiń 25 jyldyǵy qurmetine oraı ótkizip otyrmyz, – dedi A.Satybaldın.
Týrnırde Astana qalasynyń orta mektep oqýshylary ózara saıysqa túsip, jeńimpazdarǵa syılyqtar tabys etildi.
Taǵy bir aıta ketetin jaıt, sharany «Asyq atý» federasııasymen birge Ulttyq mýzeıdiń mýzeı pedagogıkasy jáne balalar shyǵarmashylyǵy bóliminiń estetıkalyq tárbıe berý sektory uıymdastyrdy.
Qarshyǵa KÚLEN