Teatr kóktemi ońtústikten bastaldy

Kóktem ońtústikten bastalady degen sóz búginde támsilge aınalyp ketkendeı tilge eriksiz oralady. Kóktem – qysta ilgen jabaǵy júndi sypyryp tastap, kóńilge shattyq uıalatatyn kógildir kóılek kıgendeı ǵajap mezgil ǵoı. Naýryzda respýblıkalyq aqyn­­dar aıtysyn ótkizgen ońtús­tik endi «Teatr kóktemi-2016» ob­lystyq festıvalin de joǵary dárejede ótkizip úlgerdi. Qazaqta Raqymjan Otarbaev­taı asa talantty qalamger bar. Oblys­tyq mádenıet basqar­ma­­sy­nyń basshysy Kúlııa Aıdar­­bekova festıvaldyń repertýaryn shyǵarmalarynyń tynysy bólek, shoqtyǵy bıik jazýshynyń týyndylaryna arnap, durys is qyldy. О́ıtkeni, «Barmasań, kelmeseń jat bolasyń» degendeı, Qazaqstan atty qutty shańyraqtyń astynda otyryp, Elbasy aıtqandaı, ár oblystyń jeke handyq qurǵandaı bir-birimen aralaspaýy óz-ózimen buıyǵylanýǵa alyp keleri haq qoı. El Táýelsizdiginiń 25 jyl­­dyǵyna oraı uıymdas­ty­rylǵan saltanatty sharaǵa oblystyń toǵyz teatry qatysty. Barlyǵy arnaýly júldelermen marapattaldy. Asanáli Áshimov, Esmuhan Obaev syndy teatr tarlandary qazylyq etken festıvalda ár teatr óz boıy, talantyna laıyq sybaǵalaryna ıe boldy. Áıtse de bas júldege avtor arnaıy tikken avtokólik – bireý. «Qı­nalǵan Jambyl jeri osy» bolǵan. Festıvaldyń jabylý salta­natynda júlde qory 1 mln. teńge bolatyn «Eń úzdik qoıy­lym» atalymymen J.Sha­nın atyndaǵy oblystyq akade­mııalyq qazaq drama teatry ma­rapattalsa, «Eń úzdik rejıssýra» atalymymen oblystyq orys drama teatrynyń rejısseri I.Verbıskıı (júlde qory 500 myń teńge), «Akterlyq ansambldik tutastyq» atalymymen oblystyq ázil-syqaq jáne satıra teatry (500 000 teńge), «Tarıhı taqyrypty úzdik meńgergeni úshin» atalymymen Túrkistan qalasynyń sazdy-drama teatry (300 myń teńge), «Patrıotızmdi úzdik beınelegeni úshin» atalymymen oblystyq qýyrshaq teatry (300 000 teńge), «Eń úzdik er adam» atalymymen Q.Jandarbekov atyndaǵy Je­tisaı drama tea­trynyń akteri S.Áriphanov (200 myń teńge), «Eń úzdik áıel adam» atalymymen oblystyq ózbek drama teatrynyń aktrısasy D.Halmetova (200 myń teńge), «Ekinshi plandaǵy er adam» atalymymen oblystyq ózbek drama teatrynyń akteri U.Nasyrov (100 myń teńge), «Ekin­shi plandaǵy áıel adam» ata­lymymen J.Shanın atyndaǵy oblystyq akademııalyq qazaq drama teatrynyń aktrısasy A.Nur­tazına (100 myń teńge) marapattaldy. Uly Abaıǵa arnalǵan, qazaq­tyń ádebıeti, teatry álemindegi klassıkteri Muhtar Áýezov, La­tıf Hamıdı jáne Ahmet Juba­novtyń qalamy tıgen, uly jú­rekterinen týǵan shyǵarma osy­laı­sha kósh bastap, saltanatty sha­ranyń shymyldyǵyn japty. Baqtııar TAIJAN, «Egemen Qazaqstan» Ońtústik Qazaqstan oblysy