Aýyldaǵy jıhaz sehy

Onyń buıymdaryn kórshi aýdan turǵyndary da satyp alýda Jaqynda Zaısan aýdanynyń Qarabulaq aýylynda bolǵanymyzda jıhaz sehynyń jumysymen tanysýdyń oraıy keldi. Aýyl ákimi Qambar Shılibaev isker azamat Qasym Jaqınashevtiń eki dosymen birge «Bıznestiń jol kartasy-2020» baǵdarlamasy boıynsha 3 mıllıon teńge nesıe alyp, oǵan qajetti qural-jabdyqtardy satyp alǵanyn, qazir jıhazdyń túr-túrin shyǵaryp jatqanyn tilge tıek etti. Qasymdy jumys ornynan jolyq­tyrdyq. Az sóılep, kóp tyńdaıtyn azamat saýaldarǵa sarań jaýap qaıtardy. – Jandos Halıtov, Jandos Tura­hanov jáne men 7 paıyzdyq ústememen jeńildetilgen nesıe aldyq. Aǵash tiletin stanoktar Reseıdiki, al jonylǵan taqtaılar men plıtalardy jer-jerden alyp jatyrmyz. Bastapqyda isimiz alǵa bassa jaqsy, al shyǵarǵan taýarlarymyz ótpese ne isteımiz dep qobaljyǵanymyz ras. «Kóz qorqaq, qol batyr» degen ras eken, alǵash ret aýyldaǵy Abaı atyndaǵy orta mektepten 15 oqýshylar partasyn jasaýǵa tapsyrys tústi. Tipti, Saryterek, Jarsý aýyldaryndaǵy mektepterge ústel, oryndyq, shkaf jasap berdik. Sapasy jaqsy, baǵasy arzan jıhaz bolǵan soń satyp alyp jatqandar bar, – dep Qasym aǵynan jaryldy. Ádette, oblys ortalyǵynan jet­kizil­gen jıhazdyń baǵasy Zaısanǵa jetkenshe shyrqap ketetini belgili. Birde Qasym ózderi shyǵarǵan qabyrǵa jıhazyn aýdan ortalyǵyndaǵy jıhaz satatyn dúkenge aparyp, baǵasyn 40 myń teńgege baǵalaıdy. Kózdiń jaýyn alatyn jıhazdy dúken satýshysynyń basqa bireýge óz kózinshe 80 myń teńgege satyp jibergenin kórgende, ónimderiniń shyn máninde sapaly ekenine kóz jet­kizedi. Tipti, Tarbaǵataı aýdanynyń birneshe mektebinen jıhaz jasaýǵa tapsyrys túskeni aýyldaǵy sheberhananyń ataǵyn alysqa jetkizgeni sózsiz. – Ústel, shkaftardyń baǵasyn 15-18 myńnan arttyrmaımyz. Aýyldyq jerde aqshanyń tapshy ekeni belgili. Eń bastysy, jerlesterimniń alǵysyn alsaq, odan artyq  baqyt bar ma? – deıdi jıhaz sehynyń jetekshisi Qasym inimiz. Qarabulaq aýylynda Gúldana esimdi kásipker naýbaıhana ashyp, úsh adamdy jumyspen qamtamasyz etip otyr eken. Aýyl turǵyndary Gúl­dana pisirgen nannyń dámi keremet deıdi. Taıaýda aýyl ákimi Qambar Shılibaevpen tildeskenimizde isker azamattardyń toǵanda forel balyǵyn ósire bastaǵanyn aıtty. Ońdasyn ELÝBAI, jýrnalıst Shyǵys Qazaqstan oblysy, Zaısan aýdany Sýrette:  Qasym Jaqınashev jıhaz sehynda