Jýyrda Astanadaǵy «Qazaqstan» konsert zalynda el Táýelsizdiginiń 25 jyldyǵyn merekeleý aıasynda Qazaqstan Respýblıkasy Memlekettik kúzet qyzmetiniń qurylǵanyna 2 jyl tolýyna oraı tamasha kesh bolyp ótti.
Konsertti Prezıdenttik orkestr án jáne estrada ansambliniń bastyǵy, Qazaqstannyń eńbek sińirgen qaıratkeri Janat Shybyqbaev úrmeli aspaptar orkestriniń súıemeldeýimen A.Esmuhannyń «Otanym» atty tanymal ánimen ashty. Qashanda óz tyńdarmandaryn qaıtalanbas repertýarymen tańǵaldyryp kelgen QR MKQ shyǵarmashylyq ujymy bul joly da Prezıdenttik orkestr mýzykanttarynyń avtorlyǵyndaǵy tyń týyndylarymen qýantty. Konsertte tusaýy kesilgen «Aqberen» kúıin de halyq erekshe yqylaspen qabyldady. Kompozısııa avtory Prezıdenttik orkestr halyqtyq mýzyka ansambliniń dombyrashysy, kompozıtor Baqytjan Dúısenǵazıev.
Oǵan «Uly dala» kúıin qosyńyz. Atalǵan shyǵarma avtory – Prezıdenttik orkestr halyqtyq mýzyka ansambliniń jetekshi solısi, dombyrashy Jandos Muhtarov. Bul kúı ótken jyly Memleket basshysynyń ıdeıasyn qoldaý maqsatynda týyndaǵan bolatyn. «Uly Dala» ataýy men saryny qazaq dalasynyń sheksizdigin, bizdiń atamekenniń ótkeni men búgingisin, bolashaǵyn kórsetedi. Osy kúıdiń súıemeldeýimen Prezıdenttik orkestrdiń bı ansambli alǵash ret Talantbek Shorýkov pen Mádına Álıeva-Shorýkova jańa qoıylymyn oryndady. Kesh barysynda qurama orkestrdiń súıemeldeýimen Prezıdenttik orkestrdiń solısteri, Qazaqstannyń eńbek sińirgen qaıratkerleri Ardaq Balajanova, Dosymjan Tańatarov, halyqaralyq jáne respýblıkalyq konkýrstardyń laýreattary Nurbolat Qusaıynov, Qaıbar Allajar, Ásel Mádekeshova, Bıbigúl Saýytova, Aıman Ýdanova, Álibek Izbasarov, Gúlsanym Jumaǵalıevanyń jáne basqalardyń oryndaýynda otandyq jáne sheteldik kompozıtorlardyń shyǵarmalary shyrqaldy.
Raýshan TÁÝIRHANQYZY,
«Egemen Qazaqstan»