ORAL. 4 mamyr. О́tken jyly Oral qalasy aýmaǵynda jalpy sany 8804 quqyq buzýshylyq oqıǵasy tirkelgen. Sonyń ishinde alıment óndirýge qatysty 379 qylmystyq is boıynsha sot aldy tekseris jumystary bastaldy. Bul týraly Oral qalalyq prokýratýranyń baspasóz qyzmetine silteme jasaǵan egemen.kz tilshisi habarlady.
Onyń aıtýynsha, alıment óndirýge qatysty qozǵalǵan qylmystyq ister sanynyń kóptigine qaramastan, sotqa bar bolǵany bir-aq qylmystyq is joldanypty. Qalǵan ister qysqartylyp, tolyqqandy tekserý, anyqtaý júrgizý máselesi múlde nazardan tys qalǵan.
Naqty aıtar bolsaq, kúni búgin 5784 qala turǵyny alıment tóleýshi bolyp tabylady. Sonyń tek 1700-i ǵana ul-qyzyn kútip-baǵýǵa jumsalatyn alıment qarjysyn óz erkimen aýdaryp otyr. Al tórt myńdaı azamat alıment tóleýden basyn alyp-qashyp, sot oryndaýshylary men ishki ister organdarynan boı tasalap júr. Kópshiligi jumys isteıtin jerin, tabysyn jasyrýdy jón kóredi. Alıment tóleýden qashqaqtaıtyn ata-analardyń deni turaqty eńbek etedi, ıaǵnı sotpen shyǵarylǵan sheshimdi oryndaýǵa qarjylyq jaǵynan tolyq qabiletti.
Prokýrorlyq tekseris kezinde 70 boryshkerdiń jyljıtyn jáne jyljymaıtyn múlki bar ekendigi anyqtalǵan. Bes boryshkerdiń múlkine sot oryndaýshylar tarapynan eshqandaı tyıym salý sharasy qoldanylmaǵany belgili boldy. Osyǵan oraı aldaǵy ýaqytta júıeli jumys jospary bekitildi.
Temir Qusaıyn.
Derek: Oral qalalyq prokýratýranyń baspasóz qyzmeti.
Foto: 7ya.ru.