El ishinde kópshilikke elene bermeıtin qarapaıym ǵana jumys qolynyń biri – monshashylyq kásip. Jáne jumystyń bul túrin meńgere bilý de, ony iske asyrý da ońaı emes.
Jympıty aýylynyń turǵyny, zeınet demalysyndaǵy Gúlpan Hamzına bolsa, osy kásipti, ıaǵnı, monshashylyqty meńgergendigine áste ókinip kórmepti.
Gúlpan Hamzaqyzy – Buldyrty aýylynyń týmasy. Ákesi Hamza – Ǵalıev Uly Otan soǵysynyń ardageri. Elge aman-esen oralǵan soń, Hamza aǵa ustazdyq salada, odan soń shıkizat daıyndaý keńsesinde qyzmet atqardy.
Hamza aǵa jubaıy Orynaımen bir ul, jeti qyzdy ómirge ákelip, tárbıeledi. Tek bir ókinishtisi, Hamza aǵa soǵys jaraqaty zardabynan 60 jasynda ómirden ótse, Orynaı áje 80 jasynda baqılyq boldy.
Adaldyq, eńbekqorlyq degennen shyǵady, osy Ǵalıevter áýletinen taraǵan urpaqtar shúkirshilik delik, aýyldastaryn, aǵaıyn-týmany jerge qaratyp kórmepti. Mysaly, áńgimemizdiń basty keıipkeri Gúlpannyń ózi Buldyrty orta mektebin bitirgen soń, aýyldaǵy poshtaǵa hat-habar, basylymdar tasýshy retinde qyzmetke alynyp, bul salada jeti jyldaı ter tóge bildi.
Bálkim osy salada júre berer me edi, poshtashy qyz Gúlpanǵa jympıtylyq shopyr jigit Haıdar kezdesip, aqyr sońy eki jas 1975 jyly shańyraq qurýǵa ýádelerin baılaspaǵanda?!
Sóıtip, Jympıty aýylyna kelin bolyp túsken Gúlpan apa ortalyqtaǵy shujyq ónimin daıyndaý sehyna qyzmetke ornalasyp, Almaty qalasynan arnaıy mamandyqta oqyp kelgen soń, osy kásibinde taban aýdarmastan 15 jyl istedi. Biraq, keńestik zaman toqyraýǵa ushyraǵan soń ortalyqtaǵy shujyq sehynyń da jumysy 1995 jyly toqtap, mundaǵy adamdar da endigisin óz kúnderin ózderi kórýge májbúr boldy. Solardyń biri Gúlpan Hamzaqyzy edi.
1997 jyldary Gúlpan apa úıden peshke nan pisirip, tary, talqandy satýǵa shyǵaryp otyrdy.
Qazandyqtaǵy shoqtyń qyzýy Gúlpan apanyń beti-qolyn kúıdirip, qınalǵan sátteri de osy kezder edi. Áıtse de, «Eńbektenseń – bári bar» degendeı, qaısarlyq kórsete bilgen Gúlpan apa aýladaǵy eskileý monshany balalarymen jóndep, retke keltirgen soń, kórshi-kólemderdiń talǵamyna saı paıdalana bilýlerine qalypty jaǵdaı jasady.
Baıqap kórse, monsha qyzmetin paıdalaný jaǵy óte tıimdi kórindi. Tipti, monshaǵa jekeleı de, erli-zaıypty retinde de tapsyrys berýshiler qatary endigi jerde molaıa tústi.
Gúlpan apa endi myqtap oılandy. Balalarymen aqyldasyp, ábden keńesip, kórdi. Otaǵasy Haıdar aǵanyń da marqum bolǵanyna 9 jyldyń júzi bopty. О́zi bolsa, zeınetker. Bala-kelinniń de alatyn jalaqylary mardymsyz. Ne isteý kerek?
Aqyr sońy balalardyń uıǵarymdarymen memleket tarapynan nesıelik qarajat alyp, aýladaǵy úıdi de qazirgi zamanaýı turǵyda kúrdeli jóndeýden ótkizip, eski monshanyń ornyna jańa monshanyń qurylysyn salýǵa belderin bekem býdy.
Sheshim qabyldandy, is osylaısha júzege asyrylatyn boldy.
– Shúkir, balalarymnyń arqasynda úı de kúrdeli jóndeýden ótti, jańa monsha da salyndy. О́zim jeke kásipker retinde zańdy túrde tirkelip, salyqtyq tólemdi ýaqytyly tólep otyramyn. Qazir aýdan ortalyǵyndaǵy turǵyndar óz qalaýlarymen monshama tapsyrys berip, soǵan saı qaltqysyz qyzmet kórsetip otyrǵan jaıym bar, – deıdi Gúlpan apa áńgime arasynda.
Shynynda, «Hamzına G» atty jeke kásipkerlik ıegeri Gúlpan Hamzına qazirgi mamandyǵy monshashylyqqa ábden berilgen. О́ıtkeni, kásipker G.Hamzınanyń aıtýynsha, burynǵy kezderi monshaǵa sýdy shelektep, bóshkemen qudyqtan tasymaldaıtyn bolsa, endigisin «Aqbulaq» baǵdarlamasy iske asqannan beri sý máselesi ábden sheshilgen kórinedi.
Al, monshaǵa otyn-sý ázirleýde uldary Qaıyrbek, Berdibek úlken qolqanat bolsa, monsha ishiniń tazalyǵy, hlorly eritindimen jýyp-shaıý jaǵyn Gúlpan apa ózi atqarady.
– Monsha qyzmetin jaz kezinde únemi turǵyndarǵa kórsete bilsek, qysqy ýaqytta senbi, jeksenbi kúnderi tapsyrysqa sáıkes belgili ýaqytpen júzege asyrýdamyz. Aýdandaǵy salyq komıteti arqyly 6 aıǵa orta eseppen 3000 teńgedeı negizgi tólemdi tólep otyrsam, kúnige turǵyndarǵa (ár adamǵa 250 teńge) monsha qyzmetin kórsetýden 5000 teńgedeı qarjy otbasy qazanyna túsedi. Sondaı-aq, aýlamyzdaǵy usaq mal, 3-4 iri qara, taýyqtarym da kúndelikti tabys kózine aınalyp otyr, – deıdi Gúlpan apa.
Joǵaryda aıtyp ótkenimizdeı, Ǵalıevter áýletinen taraǵan jeti qyz búginde Aqtaý, Shymkent, Aqtóbe, Oral qalalarynda bir-bir otaý ıeleri atanyp otyrsa, jalǵyz ul Qýanysh nemis qyzy Ekaterınaǵa úılenip, Buldyrtyda urpaq qyzyǵyna bólenýde.
Al, osy urpaqtardyń ortasyndaǵy Gúlpan Hamzaqyzynyń óziniń eńbekqorlyǵymen áýelden kózge túsip, kezinde aýyldyq, aýdandyq, oblystyq, keńestiń depýtaty bolǵandyǵyn, tegin joldamamen shetelge deıin barǵandyǵyn, birneshe marapattyń ıesi atanǵandyǵyn halyqtyń biri bilse, endi biri bilmesi de anyq.
Desek te, búginde zeınetker bolsa da eńbekten qol úzbeı, halyqtyń alǵysyna bólenip otyrǵan «Hamzına G» jeke kásipkerliginiń ıesi G.Hamzınanyń bul tirligi úlgi etýge turarlyq. Búginde urpaqtary, nemere, jıenderiniń qyzyǵyna bólenip otyrǵan monshashy Gúlpan apa jóninde oı tolǵap, aıtarymyz da osy edi.
Músirbek AITAShEV
Batys Qazaqstan oblysy,
Syrym aýdany
Sýretti túsirgen
Baýyrjan ShIRMEDINULY