Atqarylar kóp is bar

Ol úshin bastaýysh uıymdardyń belsendiligin kóterý qajet «Nur Otan» HDP Kókshetaý qa­lalyq fılıaly partııa uıymynyń VII esep berý-saılaý konferen­sııa­synyń negizgi tujyrymy bastaý­ysh uıymdardyń belsendiligi men jumys tásilderin jetildirýge saıa­dy. Bul – 33 uıymnan saılanǵan 165 delegattyń ortaq oıy. – Atqarylyp jatqan jumystar da az emes, – dedi Kókshetaý qala­lyq fılıalynyń tóraǵasy, qala ákimi Munarbek Búrkitbaev. Munda jetekshi partııa músheleriniń basta­mashyldyǵy, uıystyrýshy qyzmeti úlgi bolarlyqtaı. Qurmetti­le­ri­miz­diń basym kópshiligi osy zalda otyr. Qalanyń áleýmettik-ekonomıka­lyq damýyna taldaý jasaǵan baıan­da­mashy jyl ishinde ónerkásip ón­dirisi 32 mıllıard teńgelik, ıaǵnı buryn bolmaǵan deńgeıge jetkenin málimdedi. Bul 2009 jyldyń kór­set­kishinen 8 mıllıard teńgege ar­tyq. Investısııalyq tartymdy­ly­ǵy artqan qalada kóptegen óndiris oshaqtary ashyldy. Sońǵy aılarda ǵana ındýstrııalyq-ınnovasııalyq úde­meli damý baǵdarlamasy sheń­be­rinde keramıkalyq kirpish zaýyty, astyq qabyldaý jáne un tartý kesheni, basqa da mańyzdy nysandar paıdalanýǵa berildi. Kókshelik 1127 otbasy turǵyn úımen qamta­ma­syz etilse, jeltoqsan aıynda esigin ashqan 1200 oryndyq tórt balabaqsha jurtshylyqty qýanysh­qa bóledi. Astanalyq oblys orta­lyǵynda shaǵyn jáne orta bıznes­tiń 17 myńnan astam nysany ıgilik tógýde. Jyl ishinde 8 myń jańa jumys orny qurylýy jańa ári serpindi josparlar túzýge múmkin­dik beredi. Qalalyq uıymnyń basty jıy­nyn­da «Nur Otan» HDP Aqmola ob­lystyq fılıalynyń tóraǵasy, ob­lys ákimi Sergeı Dıachenko, «Nur­ly kósh» aýyly partııalyq baqylaý beketiniń tóraǵasy Meırambek Qıy­qov, «Tynys» AQ bastaýysh uıymy­nyń jetekshisi Vladımır Kýlıas, qalalyq aýrýhananyń bas dárigeri Serik Kákenov, «Jas saıasatker» klýbynyń múshesi Áıgerim Ýasheva tolǵaqty pikirlerimen bólisti. Konferensııaǵa «Nur Otan» HDP Saıası keńesiniń múshesi Ivan Saýer qatysty. Baqbergen AMALBEK, Aqmola oblysy.