ASTANA. 5 mamyr. Úndistannyń Chhattısgarh shtatynda jolaýshylar avtobýsy kópirden qulap, 13 adam qaza tapty. Sondaı-aq, 53 jolaýshy túrli deńgeıde jaraqat aldy. Bul týraly RIA «Novostı» aqparat agenttigine silteme jasaǵan egemen.kz tilshisi habarlady.
Oqıǵa jergilikti ýaqyt boıynsha, saǵat 22:30-da boldy. Avtobýs Garhva qalasynan Raıpýr aımaǵyna baǵyt alǵan. Polısııa qyzmetkerleriniń málimdeýinshe, júrgizýshi aldynan shyqqan motosıklge soqtyǵyspas úshin qarsy betke ótip ketip, rýlge ıe bola almaı qalǵan. Saldarynan qoǵamdyq kólik sýy tartylyp qalǵan ózenniń ańǵaryna qulap, birneshe ret aýdarylǵan.
«Ázirge bizdiń qolymyzǵa kelip túsken aqparat boıynsha, 13 adam mert bolyp, Ambıkapýr aýdanyndaǵy aýrýhanada 16 jolaýshy aýyr halde jatyr. Sonymen qatar, taǵy 37 adam túrli deńgeıde jaraqat aldy», – dedi polısııa qyzmetkeri.
Aıta keteıik, Úndistan álemdegi kólik apaty jıi bolatyn elderdiń biri. Beıresmı málimetter boıynsha, bul elde jylyna 200 myńǵa jýyq adam jol-kólik oqıǵasynan opat bolyp, júzdegen myńy zardap shegedi.
Aıan Ábdýálı.
Derek: RIA «Novostı».
Foto: rbc.ua.