QARAǴANDY. 5 sáýir. Qaraǵandylyq gımnasshy qyz Alına Ádilhanova kórkem gımnastıkadan Astanada ótken Azııa chempıonatynda úsh altyn medaldi jeńip aldy. Bul týraly oblystyq dene shynyqtyrý jáne sport basqarmasynyń baspasóz qyzmetine silteme jasaǵan egemen.kz tilshisi habarlady.
Osy tolaıym tabysqa oraı Qaraǵandyda baspasóz máslıhaty ótti. 14 jastaǵy Alına Ádilhanova Saryqurlyq synynda barlyǵy 6 medal jeńip aldy. Onyń úsheýi – altyn, qalǵany – kúmis.
«Meniń eń basty qarsylastarym Japonııa men О́zbekstan gınasshylary boldy. Alaıda, olar tek jarys kileminde ǵana qarsylas, al ómirdiń ózinde biz dospyz. Olar meni jeńisimmen quttyqtady», – deıdi Alına.
Gımnasshy qyzdyń jattyqtyrýshysy Lıýdmıla Makarova shákirtiniń jetistigi joǵary bolsa da, tóreshilerdiń keıbir sátterde burmalaýshylyqqa jol bergenderin aıtty. Mamannyń oıynsha, Alına osy chempıonatta tórt «altyn» alýy kerek eken.
Qaırat Ábildınov.