Halyq Qadyrymen qoshtasty

Qazaqstannyń halyq jazýshysy, Memlekettik syılyqtyń laý­reaty, asa kórnekti aqyn Qadyr Myrza Áliniń ómirden ozýy qazaqtyń ádebıeti men mádenıeti úshin, jalpy el úshin orny tolmas aýyr qaza boldy. Alash úshin azaly osynaý kúnderde Altaı men Atyraý, Jetisaı men Qyzyljar arasyndaǵy qaryndas qaýym «qazaqtyń Qadyry» atanǵan ardager aqynyn kúızele joqtaýda. Eki kún alaı-dúleı aq qar qar­lata burqanyp, keshe kókala bult­tan só­gilip ashylǵandaı Almaty ar­­daqty aqynǵa sońǵy qurmet-qo­she­metin kór­setti. Marqummen qosh­­ta­sý rá­­simi ótken M.Áýezov atyn­daǵy akade­mııa­lyq drama teat­ry ǵımara­ty­nyń mańaıy da, ishi de qara­qu­rym halyq. Iá, Qadekeń ózi aıt­qan­daı, «sóz syılaıtyn halqy aman tur­ǵanda» aqynyn ólimge bermeıtinin aıǵaqtaıtyn kórinis edi bul. Qazaqstan Jazýshylar odaǵy basqarmasynyń tóraǵasy Nurlan Orazalın qaraly mıtıngini aqyn rýhyn asqaqtatar tebirenisti lebizben asha kele, Memleket bas­shy­sy Nursultan Nazarbaevtyń óki­nishti qazaǵa baılanysty jol­da­ǵan kóńil aıtý jedelhatyn oq­yp berdi. Qaıǵyǵa ortaqtasqan mundaı jedelhattar Senat Tór­aǵasy Q.Toqaevtan, basqa da bir­qatar laýa­zymdy, belgili adamdardan kelgen eken. Prezıdent Ákim­shiligi Ishki saıasat bóliminiń meń­ge­rýshisi Darhan Myńbaı aq­yn­nyń ólmes tý­yndylary onyń ekin­shi ómirin bastaǵandyǵyn at­ap kórsetti. Úlken delegasııany bastap kel­gen Batys Qazaqstan obly­sy­nyń ákimi Baqtyqoja Izmuham­betov týǵan eli men jeriniń alyp perzentine degen ystyq súıis­penshiligi men sońǵy qosh-qoshyn jetkizdi. Budan keıin sóz alǵan Qadekeńniń qalamdas ta qanattas hám murattas aǵa-inileri men dos­tary Sherıazdan Eleýkenov, Tu­man­baı Moldaǵalıev, Asanáli Ásh­imov, Beksultan Nurjekeev, Aqushtap Baqtygereeva eline kenishti jyr, kenen syr tolǵap ót­ken azamat aqyn jaıynda júrek­jardy sózderin tolǵady. «Qazaq barda Qadyr bar, halqy barda Qadyr aqyn ólmeıdi», dedi olar. Ásirese, Tumaǵańnyń qımas asyl dosqa arnaǵan aq adal jyry kóńilderdi eljirete egiltti. Birtýar azamatpen qoshtasýǵa Qy­zyl­orda oblysy arnaıy delegasııa jiberipti. Almaty qalasy áki­miniń orynbasary Serik Seıdýmanov aqyn esimin este qal­dyrýǵa baılanysty sharalar oılastyratynyn aıtyp jatyr. Jarty ǵasyrdan astam «jyr kemesin kók daýylmen jaǵalas­tyrǵan» dana shaıyrdyń máıitin aqyrynda, ózi aıtqandaı, Keńsaı­daǵy «Qabirstan qushaǵymen qaý­syrdy». Qazaqtyń taǵy bir uly aqynynyń arýaǵyna baǵyshtalyp quran oqylyp, asy berildi. Qorǵanbek AMANJOL.