Ádepten asqandary nesi?

Birer basylymnyń betinde kóńilime kirbiń túsirgen ujymdyq hattardyń shyǵyp ketýi qolyma eriksiz qalam aldyryp otyr. Eń áýeli aıtarym, men sońǵy kezderi densaýlyǵyma baılanysty elimizdiń qara qazandaı qaınap jatqan qyzý tirshiligine aralasa almaı, syrt qalyp, shet jaılap júrgen adammyn. Soǵan oraı shyǵarmashylyq belsendiligim de báseńdegenin baıqaımyn. Qoǵamda ózekti máselelerge qatysty bolyp jat­qan pikirtalastarǵa da densaýlyǵyma baı­lanysty ún qosa almaǵanym ras. Biraq, bul osy búkil eldi tolǵandyryp otyrǵan máseleler týraly meniń ózindik, azamattyq oı-pikirim joq degen sóz emes. Tek ol pikirimdi, óz sózimdi men óz aýzymmen, óz qalamymmen ózim aıtýym kerek. Bul rette maǵan kómekshi, tilmash qajet emes. Áıtkenmen, jaqynda Elbasy atyna joldanǵan ujymdyq hattyń sońyna qol qoıǵan avtorlar­dyń ishinen óz atymdy kórip, juqa­lap aıtqanda, tań qaldym. Men ondaı hatty jazǵan da emespin, kórgen de emespin. Álbette, qol da qoıǵan joqpyn. Mundaı hat­tarǵa kórmeı-bilmeı qol qoıar ıisalmasty da basqa jaqtan izdeńiz. Oıpyrmaı deımin, bizdiń zııaly degen jigitterimiz qandaı bolyp barady? Tipten, álgi hatty kórsetpeı, oqytpaı, kelisimimizdi almaı, syrttan qolymyzdy qoıyp jiberýin ne deýge syıady. Ádepsizdik pe, arsyzdyq pa? Meniń aıtpaǵanymdy aıtty deýge, jazbaǵanymdy jazdy dep kór­setýge qaıtip dátteri barǵan? Sony bile almaı dalmyn. Estýimshe, qolyn syrttan qoıyp jiberip ot basyp oıbaılap qalǵan paqyryńyz jalǵyz men ǵana emes sııaqty. Sonda jańa­ǵy ujymdyq hattaryńyzda ne qun, qandaı qadir-qasıet qaldy? Jáne de hattyń jazylý mánerindegi dórekilikti, óktemdikti, ozbyr­lyqty kórip, hakim Abaı sııaqty, men de «betti bastym, qatty sastym». Tek adamnyń syrtynan qol qoıǵysh ondaı pysyqaı ádepsizderden tura qashqan joq­pyn. «Egemen Qazaqstan» gazeti arqyly olardyń osy keleńsiz qy­lyqtaryn aıtýǵa bekindim. Qarapaıym ádepti umytpaıyq­shy, aǵaıyn. Al qurmetti oqyrman­nan suraıtynym, álgi dúmbilez hattardyń avtorlary ishinde meni joq dep sanaýlaryńyzdy suraımyn. Serik QIRABAEV, akademık