«Jas qanat-2016» jeńimpazy anyqtaldy

«Jas qanat – 2016» jas ánshilerdiń respýblıkalyq baıqaýynyń alǵashqy konserti 20 mamyr kúni ótken bolatyn. Bul kún tek qatysýshylar ǵana emes, qazylar alqasy úshin de asa tolqymaly sátterge toly boldy. Ásirese, Medeý Arynbaev, Marjan Arapbaeva, Mádına Sadýaqasova, Janar Duǵalova syndy jasqanattyqtarǵa konsert erekshe tosyn syı tartypty. Olar «Jas qanat» baıqaýynyń muraǵatyndaǵy beınejazbadan ózderiniń óner kórsetken kezderin tamashalap, ótken kúnge saıahat jasady. Saıysqa qatysýshy ónerpazdar bul jolǵy báıgeden ózderiniń óner joly­na úlken sa­baq alyp qana qoı­maı, Astana qalasymen de keńinen tanysyp úlgerdi. Olaı deı­tinimiz, jarysty uıym­dastyrýshylar úmit­kerlerdiń árbir kúni áserli bolýy úshin qalamyzdyń kórikti jerlerine saıahat uıymdastyrǵan bolatyn. Solardyń soń­ǵysy ári qatysýshylar úshin eń mańyzdysy elorda ákimdigindegi kezdesý boldy. Astana qalasy ákiminiń orynbasary Ermek Amanshaev ónerli órendermen júrekjardy áńgime qozǵady. «Jas qanattyń» endi-endi aıaqqa tura bergen kezeńine kóz júgirtip, jas daryndardy qanattandyrdy. Kezdesý sońynda qatysýshylar bir aýyzdan «Aıttym sálem qalamqas» ánin tartý etip, rızashylyqtaryn jetkizdi. Ákim orynbasary estelik kitaptar men gúl shoǵyn tabystady. Sonymen, saıys qorytyndysyna keletin bolsaq, úsh kún boıy úmitkerlerdiń arasynan úzdik bolyp, óziniń ónerimen kórermendi de, qazylardy da erekshe tańǵaldyrǵan Parasat Otan oza shyǵyp, jarystyń jeńimpazy atandy. Ekinshi oryn Qaraǵandydan kelgen «Úsh júz» tobyna buıyrsa, úshinshi oryndy oraldyq Aıbek Dáýletqalıev enshiledi. Sondaı-aq, mereıtoılyq gala-konsertte elimizdiń tanymal ánshileri Mádına Sadýaqasova, Medeý Arynbaev, Marjan Arapbaeva, Janar Duǵalova, «Melomen» toby, Nurlan Abdýllın, Nurjamal Úsenbaeva, Erlan Kókeev, Baqyt Shadaeva, Dımash Qudaıbergen óner kórsetti. Raýan QAIDAR, «Egemen Qazaqstan»