Jeńil qaljyńnyń jetegine ergender

Byqsyp, tutana almaı jatqan shoqqa qaý shópti tastasań, lap ete qalady. Jer kodeksine baılanys­ty reformalarǵa halyqtyń qulaǵy túrik. Osyny paıdalanǵan bireý WhatsApp arqyly Shymkent qalasynda úı salýǵa 10 sotyqtan jer berilip jatqandyǵy týraly qaýeset taratyp jibergen. Shymkentte 2008 jyldan beri jer telimin berý toqtatylǵan. Sebebi, jaryq, sýy joq qula dúzden jer telimin alǵan azamattar jaǵdaılarynyń nasharlyǵyn aıtyp, qala ákimdiginiń aldynda talaı ret ereýil jasaǵan. Sondyqtan, qala ákimdigi ınfraqurylym júıesi tolyq tartylmaı, jer berýdi múlde doǵarǵan edi. Álgindeı qaýesetten keıin jer surap ákimdiktiń aldyn torýyldaǵan azamattardan eki kúnniń ishinde 3 myńǵa tarta ótinish tústi. «Osy kezge deıin azamattardan jer telimin berý týraly 65 myń 500 ótinish túsip, kezek jasalǵan. Biraq 2008 jyldan bastap jer telimin berý toqtatyldy. Sebebi, jer telimin beretin aımaqtarda ınfraqurylym joq. Biz ondaı jerdi bere almaımyz. Al myna ótinish tapsyrǵan adamdar 65 myń 500 adamnan keıin kezekke turady. Jer kezekpen ǵana beriledi», – deıdi Shymkent qalalyq jer qatynastary basqarmasynyń basshysy Qasymbek Saılaýov. Ákimdik ǵımaraty aldyna jınalǵan azamat­tardyń otyzshaqtysyn qabyldaǵan qala ákimi Ǵabıdýlla Ábdirahymov qala aýmaǵy keńeı­tilgennen beri aýyl sharýashylyǵyna tıisti 60 myń gektar jer qosylǵandyǵyn aıtty. Al qalanyń eski aýmaǵynda bos jatqan jer joq. Bar bolsa da jeke qolda satylymǵa shyǵady. Baǵasy, árıne, ýdaı qymbat. Ońtústik Qazaqstan oblysynda adam resýrsy kóp. Soǵan oraı túıt­kildi máseleler de jetkilikti. Sonyń biregeıi – baspanaly bolý. Ońtústik jurtynyń taǵy bir artyqshylyǵy – jer berseń, Úkimetke artyq salmaq salmaıdy. Aınaldyrǵan birer jylda kelisti úı salyp, kirip alady. Bardy qanaǵat etedi, artyqty suramaıdy. «Úıi joqtyń – kúıi joq» deıdi qazaq. Daby­ramen kelgen azamattardyń ótinishin qosqanda, Shymkentte jer kezeginde turǵandardyń sany 70 myńǵa jýyqtady. Jetpis myń adam – jetpis myń otbasy. Baqtııar TAIJAN, «Egemen Qazaqstan» Ońtústik Qazaqstan oblysy