Qostanaı oblysy sıfrlyq transformasııa baǵytynda belsendi jumys júrgizip keledi. 2025 jyly óńirdegi avtokólik qurastyrý zaýyttarynda, taý-ken óndirisi men mashına jasaý kásiporyndarynda 101 ónerkásiptik robot ornatyldy. Buryn engizilgen júıelerdi qosa eseptegende, qazirgi tańda óndiriste 145 robottandyrylǵan keshen jumys istep tur. Mundaı tehnologııada óndiris tıimdiligin arttyrýǵa, tehnologııalyq úderisterdiń turaqtylyǵyn qamtamasyz etýge, ónim sapasyn jaqsartýǵa múmkindik beredi.
Qostanaı oblysy ákimdigi ınformatızasııa, memlekettik qyzmetter kórsetý jáne arhıvter basqarmasynyń basshysy Azamat Kashıevtiń aıtýynsha, óńir aldynda turǵan basty mindet – jekelegen sıfrlyq jobalarmen shektelmeı, Smart Region qaǵıdatyna negizdelgen keshendi sıfrlyq ınfraqurylym qalyptastyrý.
«Smart Region jáne sıfrlyq ınfraqurylymdy damytýdyń júıeli tásilin qalyptastyrý arqyly sıfrlyq transformasııanyń naqty nátıjesin kórip otyrmyz. Bul ónerkásiptegi úderisterdi avtomattandyrý, áleýmettik salada sıfrlyq servısterdi damytý jáne basqarý tıimdiligin arttyrý úshin derekterdi paıdalanýǵa múmkindik beredi. Negizgi nazardy óńir ekonomıkasyna ólshenetin nátıje beretin jáne turǵyndardyń ómir sapasyn jaqsartatyn sheshimderge aýdaramyz», dedi ol.
2025 jyldyń jazynda ótken Qostanai Investment Forum alańynda sıfrlyq transformasııa, jasandy ıntellektini engizý jáne joǵary tehnologııalyq jobalardy damytý máseleleri talqylandy. Forým qatysýshylary ınvestısııa tartý tetikterin jáne oblys ekonomıkasyna ınnovasııalyq sheshimderdi engizý joldaryn qarastyrdy.
Búginde oblysta agroónerkásip kesheninde, kólik ınfraqurylymynda jáne densaýlyq saqtaý salasynda sıfrlyq sheshimder belsendi engizilip jatyr. Bul jobalar basqarý sapasyn arttyrýǵa jáne sheshim qabyldaý barysynda derekterge negizdelgen tásildi keńinen qoldanýǵa baǵyttalǵan.
Aldaǵy kezeńde óńirdiń basty maqsaty – sátti sıfrlyq tájirıbelerdi aýqymdap, ekonomıkanyń negizgi salalary men áleýmettik sektorǵa jasandy ıntellekt quraldaryn júıeli túrde engizý.
