«Turǵyn úı máselesi – jas otbasylar men mamandar úshin eń mańyzdy máseleniń biri. Sondyqtan búgin men jumys isteıtin jastarǵa jalǵa beriletin turǵyn úı baǵdarlamasy týraly aıtyp ótkim keledi. Bul baǵdarlama Astana, Almaty jáne Shymkent qalalarynda jumys isteıdi. Onyń naqty maqsaty – belgili bir merzimge jas mamandarǵa qoljetimdi baspana berý, sondaı-aq óz úıin satyp alý úshin bastapqy jarnaǵa qarajat jınaýyna yqpal etý. Aı saıynǵy jaldaý aqysy óte qoljetimdi – 5000 teńge men 15 000 teńge aralyǵynda boldy. Baǵdarlama 10 myńnan astam jas qazaqstandyqty qamtydy. Baǵdarlama sharttary bastapqyda kelisimshart arqyly bekitilip, kezeńder boıynsha parametrler naqtylandy», dep jazdy A.Balaeva.
Sonyń ishinde turǵyn úı berý merzimi ózgerdi. Bul rette negizgi qaǵıdat ózgerissiz qaldy: ıaǵnı, turǵyn úı satyp alý quqyǵynsyz jalǵa berildi.
«Bul rette keıbir azamattardyń páterdi ózderinde qaldyrýǵa nıet bildirgenin jaqsy túsinemiz. Alaıda memlekettik sheshimder Zańǵa jáne barlyǵyna birdeı erejelerge negizdelýi kerek. Eger kelisimshartta, erejelerde satyp alý qarastyrylmaǵan bolsa, onda ony ózgertý – basqa azamattar men qatysýshylar úshin ádiletsizdik bolar edi. Eń mańyzdysy, memleket jastarǵa udaıy qoldaý kórsetip keledi. Qosymsha jańa, turaqty baǵdarlamalar usynyldy.Máselen, «Otbasy bankimen» birlesip 17 óńirde jeńildetilgen ıpotekalyq baǵdarlamalar iske qosyldy. Sonyń aıasynda 12 myńǵa jýyq jas maman jańa páterge ıe boldy. Onyń 1,6 myńnan astamy jalǵa beriletin turǵyn úı baǵdarlamasynyń qatysýshylary», dep naqtylady mınıstr.
Sondaı-aq jas azamattar «Otaý» jáne «Naýryz», «Naýryz Jumysker» respýblıkalyq baǵdarlamalary arqyly baspanaly boldy. Búgingi tańda barlyq maquldanǵan ótinimderdiń 62%-y 35 jasqa deıingi azamattarǵa tıesili.
«2026 jylǵy 9 qańtarda Qazaqstan Respýblıkasynyń Qurylys kodeksine qol qoıyldy. Oǵan qosa zańnamaǵa, sonyń ishinde jastar saıasaty boıynsha jekelegen tetikterdi retteýge baılanysty normalarǵa ózgerister engizildi.Soǵan sáıkes, 2026 jylǵy 27 naýryzdaǵy № 136-NQ buıryq negizinde «Jumys istep júrgen jastarǵa satyp alý quqyǵynsyz jalǵa beriletin turǵynjaı berý qaǵıdalaryn bekitý týraly» birqatar buıryqtardyń kúshi joıylyp, jumys isteıtin jastarǵa arnalǵan jalǵa beriletin turǵyn úı baǵdarlamasy toqtatylady. Bosatylatyn turǵyn úı qoryn odan ári paıdalaný máselesi turǵyn úı zańnamasyna jáne belgilengen kezekke sáıkes sheshiletin bolady, bul jergilikti atqarýshy qurylymdardyń quzyretinde», dep túsindirdi ol.
Qazirgi jalǵa alýshylarǵa keletin bolsaq:
jaldaý merzimi aıaqtalǵandar shart talaptary men bekitilgen tártip sheńberinde áreket etýi kerek. Jaldaý merzimi keıin aıaqtalatyndar kelisimshart aıaqtalǵanǵa deıin páterde tura alady.
Mınıstr barlyq suraqtar boıynsha ákimdikter men «Otbasy bankten» keńes alýǵa bolatynyn aıtyp ótti. Máseleni keıinge qaldyrmaı, ıpotekalyq baǵdarlamalarǵa qatysý múmkindikterin aldyn ala baǵalaý mańyzdy.
