Shymkentte ótken «Asqazan-ishek patologııasy bar kúrdeli naýqastar: mamandyqtar toǵysyndaǵy sheshimder» atty respýblıkalyq ǵylymı-tájirıbelik konferensııasynda mamandar semizdik eresekterge ǵana tán emes, jasóspirimderde de qalypty qubylysqa aınalyp bara jatqanyn málim etti. Gastrıt pen pankreatıt, ásirese, jastarda jıi kezdesedi. Al asqazandaǵy aýyrlyq sezim men ishtiń kebýi – mıllıondaǵan adamdar úshin ádettegi jaǵdaı. Aýrýshańdyqtyń basty sebepteriniń biri – durys tamaqtanbaý. Iаǵnı, «aýrý – astan» ekenin dertke dıagnoz qoıa almaıtyn zamanda-aq aıtyp qoıǵan babalardyń urpaǵy búginde fastfýd pen gazdalǵan sýsyndarǵa shamadan tys qumartyp, qorek etip júr. Munyń sońy semizdik pen qant dıabeti, ateroskleroz, baýyr problemalary, júrek-tamyr aýrýlarynyń asqynýyna jáne endokrındik problemalarǵa ákelip soǵady. Durys tamaqtanbaýdyń saldarynan qaterli isikke shaldyǵý da jıilep barady.
Ǵalymdar onkologııalyq aýrýlardyń aldyn alýǵa arnalǵan qospa ázirlep jatyr
«Elimizdiń ońtústiginde asqazan-ishek joldary aýrýlarynyń patologııasy bar naýqastardyń sany kóp. Elimizdiń bilikti dárigerlerin Shymkentke shaqyrtyp, atalǵan taqyrypta respýblıkalyq konferensııa ótkizýimizdiń basty sebebi de osy. Bul basqosýda kásibı mamandardyń ózekti taqyryptarda baıandamalary tyńdaldy. Bul is-sharany Almaty men Astana qalasynyń jetekshi mamandary, gastroenterologııa salasyndaǵy sarapshylar óńirimizdiń dárigerlerine, elimizdiń basqa qalalarynan kelgen áriptesterine paıdaly aqparattar usynyp, tájirıbe almasýy úshin arnaıy uıymdastyrdyq», deıdi GastroMed gastroenterologııa klınıkasynyń dırektory Lázzat Syzdyqova.
GastroMed gastroenterologııa klınıkasy Qazaqstan gastroenterologtarynyń Alıansy jáne Ońtústik Qazaqstan medısınalyq akademııasymen birlesip uıymdastyrǵan gastroenterologııalyq konferensııaǵa elimizdiń 150-den astam úzdik mamany qatysty. Olar densaýlyq saqtaý salasyndaǵy ózekti máselege aınalǵan sozylmaly asqazan-ishek aýrýlarynyń sebepterin talqylap, aldyn alý maqsatynda tájirıbe almasty.
