Shattyq syılaǵan shara

Qazaqstan Respýblıkasy Tuńǵysh Prezıdenti – Elbasy Qory Halyqaralyq balalardy qorǵaý kúni qarsańynda Aqmola oblysy jáne Astana qalasy balalar úıiniń tárbıelenýshilerine jáne múmkindigi shekteýli balalarǵa arnalǵan merekelik konsert ótkizdi. «Nazarbaev ortalyǵy» ǵıma­ratynyń aýmaǵynda «Sheberler qa­lasy» ornalasyp, onda búldirshinder halyq shyǵarmashylyǵymen keńinen tanysty jáne bir ýaqyt ózderin qysh-qumyra sheberi, maıda monshaq­pen keste tigýshi, sondaı-aq basqa da kóptegen qolóner mamany bolyp sezinýge múmkindik aldy. Merekelik sharanyń meımany bolyp kelgen jas qonaqtarǵa astanalyq bı ujymdary, ánshiler qaýymy óz ónerlerin kór­setip, kóterińki kóńil kúı syılady. Sonymen qatar, ártúrli suraqtar qoıylyp, qyzyqty oıyndar oınatyldy. «Jyldar jyljyp, aılar aýys­qan saıyn adamdardyń sany da, sanasy da birge ósip-jetiledi. Ke­she ǵana tusaýyn kesken sábıdiń erjetip, úlken azamat bolyp júr­genin kóremiz. Bul ýaqyttyń bir orynda turmaıtyndyǵyn bil­dirse kerek. Degenmen, adam balasy qansha jasqa kelse de, onyń balalyq shaǵy bárinen ystyq bolyp turady. Qaıta oralǵysy keledi, burynǵydaı esh nársege alańdamaı, asyr salyp oınaǵysy keledi. Biraq, ýaqyttyń arnasy keri burylǵan emes, burylmaıdy da. Bizdiń búgingi sharany ótkizýdegi basty maqsatymyz – balalardyń balalyq shaǵy osyndaı qyzyqty kúndermen, sáýleli sáttermen sanasynda qalǵanyn qalaımyz. Olardyń janaryna jabysqan muńnyń ornyn qýanyshpen toltyrsaq deımiz. Sondyqtan da búgingi sharaǵa jan-jaq­ty daıyndaldyq»,– deıdi Qor­dyń atqarýshy dırektory Saǵyndyq Taýpyquly. Iá, kez kelgen sábı baqytty bolý úshin jaralǵan deımiz. Al olardyń baqytty bolashaǵyn qoǵamnyń ózi turǵyzaryn esten shyǵarmaýymyz kerek. El ishindegi osyndaı ıgi sharalar arqyly balalarǵa baqyt syılaı alsaq, olar da ózderin qoǵamnyń bir múshesi ekenin sezinedi. Tiregi men qamqorshysy baryn uǵynady. Sondaı-aq, kesh aıasynda búl­dir­­shinderge arnalǵan «Táttiler festıvali» ótkizildi. Onda balalar mýltıplıkasııalyq keıipkerler keıpindegi túrli táttilerdiń dámin tatty. Shara sońynda uıym­das­ty­rýshylar qonaq bolyp kelgen balalarǵa Qordyń atynan arnaıy syı­lyqtar tabys etip, olardyń bolashaq ómirlerinde qýanysh­ty kúnderdiń kóp bolýyn tiledi. Raýan Qaıdar, «Egemen Qazaqstan»