Atyraý turǵyny óziniń tiri ekenin dáleldedi

ATYRAÝ. 1 maýsym. Atyraý turǵyny óziniń tiri ekenin dáleldeý úshin sotqa júginip, qaıtys bolǵany týraly kýáliktiń kúshin joıdyrdy. Bul týraly oblystyq sottyń baspasóz qyzmetine silteme jasaǵan egmen.kz tilshisi habarlady. Jyl basynda Atyraý oblysynyń turǵyny Elena Prıdanovanyń azamattyq nekedegi kúıeýi Nıkolaı Orlovpen birge baspanasyz qalǵanyn habarlaǵan edik. Olardyń ózderiniń de, tipti, úsh balasynyń da jeke basyn kýálandyratyn qujattary da bolmaǵan. Bir tańdanarlyǵy Elena Prıdanovanyń ózi óliler sanatynda ekeni anyqtalǵan edi. «Azamatsha Elena Prıdanova uzaq ýaqyt boıy Atyraý oblysynyń aýyldyq okrýgterdiń birinde ómir súrip, týystarymen habarlaspaǵan. Birneshe jyldar ótkennen keıin turmystyq zorlyq-zombylyqtan zardap shekken áıelderge arnalǵan daǵdarys ortalyǵyna túsken ýaqytta óziniń qaza tapqandar esebinde turǵanyn bilgen. О́z quqyǵyn qorǵaý maqsatynda Atyraý qalalyq sotyna ózine qatysty qaıtys bolý týraly aktilik jazbanyń jáne qaıtys bolý týraly kýálikti zańsyz dep aryzben júgingen. Sot otyrysynda jedel-izdestirý sharalaryn júrgizý barysynda foto arqyly aryzdanýshynyń týystary máıitti Elena Prıdanovaǵa uqsas bolýyna baılanysty sol dep tanyǵany anyqtaldy. Keıinnen aryzdanýshynyń týystarynyń biri muny qaıtys boldy dep taný týraly kýáligin alǵan. Sot otyrysynda aryzdanýshynyń barlyq týystary ony ózderiniń ápkesi, tátesi retinde tanyǵan. Jınaqtalǵan barlyq dáleldemelerdiń jıyntyǵymen sot aryzdanýshy Elena Prıdanovanyń talabyn negizdi dep tanyp, oǵan qatysty qaıtys bolý týraly aktilik jazbany jáne qaıtys bolý týraly kýálikti zańsyz dep tanydy» – deıdi Atyraý oblystyq sotynyń baspasóz hatshysy Boranbaı Ǵalıev. Joldasbek Shópeǵul. Derek: Atyraý oblystyq sotynyń baspasóz qyzmeti. Foto: azh.kz.