Taýary tegin dúken

Qaraǵandy oblysyndaǵy Osakarov aýdanynyń ortalyǵynda «Rahmet» dep atalatyn dúken tutyný­shylarǵa aıqara esik ashty. Bul saýda ornynyń basqa dúken­derden aıyrmashylyǵy sol – mundaǵy taýarlardy tutynýshylar tegin alady. – Dúken ashylǵan alǵashqy kúnniń ózinde 3 otbasyn balalarǵa jáne eresekterge arnalǵan kıim-keshektermen qamtamasyz ettik, – deıdi jobany uıym­dastyrýshylardyń biri, «Atameken» ulttyq kásipkerler palatasy janyndaǵy densaýlyq jáne qaıyrymdylyq komıtetiniń Qaraǵandy oblysy boıyn­sha jetekshisi Samal Mátenova. Dúkenniń jumys isteý júıesi sonshalyqty kúrdeli emes. Qaıyrymy mol turǵyndar ózderine kereksiz bolyp qalǵan, biraq qoldanysqa ábden jaramdy kıim-keshek pen turmystyq zattardy, úı jıhazdaryn osynda ákelip ótkizedi. Ázirge Osakarovtaǵy dúkenniń sóreleri taýardan qaıysyp tur dep aıtý qıyn. Sol sebepti, jobany uıymdastyrýshylar munda Qaraǵandydaǵy dúkennen de biraz dúnıelerdi jetkizgen. Aıta keteıik, «Rahmet» dep atalatyn mundaı dúken alǵash Qaraǵandy qalasynda ashylǵan bolatyn. Joba jumys istegen az ǵana ýaqyt ishinde 170-ten astam otbasy nandy tegin alyp, kıim-keshek pen basqa da zattarǵa kók tıyn da jumsamaı qol jetkizdi. Qaırat ÁBILDINOV, «Egemen Qazaqstan» Qaraǵandy oblysy, Osakarov aýdany