Taraz ben Máskeý arasynda ushaq baǵyttary ashyldy

Tarazǵa Máskeýden «S7» ushaǵy alǵash ret kelip qondy. 2013 jyly memlekettik bıýdjetten 4,6 mıllıard teńge bólinip, «Áýlıe-ata» halyqaralyq áýejaıy qaıta jańǵyrtylýdan ótken bolatyn. Nátıjesinde áýejaıdyń jolaýshylar termınalynyń aýmaǵy edáýir ulǵaıyp, jańaryp, joǵary múmkindikterge ıe bolǵany belgili. Sol kezde álemniń birqatar elderine ushaq baǵyttaryn ashý kózdelgen edi. «S7» kompanııasynyń ókili Evgenıı Chernyshev bul baılanys Qazaqstan men Reseı arasyna ǵana emes, Eýropanyń birneshe elderine ushaqpen jetýge  jol ashatynyn aıtady. Sondaı-aq, Máskeý arqyly Reseıdiń qaı qalasyna baryp-qaıtqyńyz kelse, baratyn jáne qaıtatyn bıletti Tarazda turyp-aq alýǵa múmkindigińiz bar eken. Máskeý – Taraz arasy shamamen 3 myń shaqyrym bolsa, 50-55 myń teńge kóleminde qarajat ketedi eken. Osy kúni Tarazda saǵat 7.05-te «Áýlıe-ata» áýejaıynan tuńǵysh ret Taraz-Máskeý baǵytyn betke alǵan ushaq 136 jolaýshymen áýege kóterildi. Bul ushaq Taraz – Máskeý arasyn apta saıyn jalǵaıtyn bolady. Oralhan Dáýit. Derek, foto: egemen.kz